Ɗan ƙunar baƙin wake ya tayar da bam a gidan mutuwa a Borno

Majiyoyi sun ce ɗan ƙunar baƙin waken ya yi basaja a matsayin wanda ya je yin ta’aziyya a gidan rasuwar.

Wani ɗan ƙunar baƙin wake ya yi basaja, tare da tayar da bam a gidan mutuwa a Dalori da ke Jihar Borno.

Harin ya yi sanadin mutuwar mutum biyu tare da jikkata mutum ɗaya.

• Boko Haram sun jikkata sojoji 6 bayan kai hari da jirgi mara matuƙi
• An kai hari kan makiyaya an kashe shanu da dama a Filato

Wani jami’in tsaro ya ce: “Ɗan ƙunar baƙin waken ya yi basaja a matsayin wanda ya zo yin ta’aziyya, kafin daga bisani ya tayar da bam ɗin.”

Jami’an tsaro sun garzaya zuwa wajen bayan samun labarin fashewar bam ɗin.

A cewar wani jami’in tsaro, an fara gudanar da bincike don gano asalin wanda ya kai harin da kuma yadda ya kai harin.

Majiyoyi sun ce an garzaya da wanda ya jikkata zuwa asibiti domin samun kulawa.

Jami’an tsaro sun ƙara tsaurara matakan tsaro a yankin domin hana sake aukuwar irin wannan hari.

“Dole ne mu kasance masu lura a kowane lokaci, saboda har yanzu akwai barazanar hare-hare daga ’yan ta’adda.

“Za mu ci gaba da yin aiki tuƙuru don kare al’umma,” in ji wani jami’in tsaro.

Hare-haren sun sanya fargaba a zukatun mazauna yankin, inda mutane ke kiran gwamnati da jami’an tsaro su ƙara tsaurara matakan tsaro a wuraren da suka fi fuskantar barazanar ta’addanci.