2023: Dan takarar Gwamnan LP a Jigawa ya koma APC
Dan takarar ya koma ne da dimbin magoya bayansa
Badaru da dan takarar APC da kuma na LP din da ya sauya shekar
Dan takarar Gwamnan Jihar Jigawa a karkashin jam’iyyar LP, Abdullahi Tsoho, ya koma jam’iyyar APC mai mulki.
Hadimin Gwamnan Jihar, Badaru Abubakar, Habibu Nuhu Kila ne ya tabbatar da hakan a cikin wata sanarwa ranar Juma’a.
- Wike ya yi barazanar hana Atiku wajen taro a Ribas
- CBN ya zargi bankuna da boye sabbin takardun kudade
Sanarwar ta ce dan takarar ya dauki matakin ne bayan ya fahimci APC na da dukkan muradun da ake bukata wajen ciyar da Jihar gaba.
Nuhu Kila ya kuma ce tsohon dan takarar ya sha alwashin cewa shi da dimbin magoya bayansa za su yi aiki tukuru wajen ganin APC ta yi nasara a zaben mai zuwa.
Yayin da yake karbarsa a ofishinsa, Gwamna Badaru ya nuna godiyarsa kan sauya shekar dan takarar, inda ya yi alkawarin cewa da shi da mutanensa za su ci gajiyar duk wani amfai da sauran ’yan jam’iyya ke ci.