Abba ya amince da N71,000 a matsayin mafi ƙarancin albashi

Ƙarin sabon albashin zai fara aiki a watan Nuwamba.

Gwamnan Jihar Kano, Abba Kabir Yusuf, ya amince da Naira 71,000 a matsayin sabon mafi ƙarancin albashi ga ma’aikatan jihar.

Gwamnan ya sanar da hakan ne a shafinsa na Facebook a ranar Talata.

• Dattijo ya shiga hannu kan zargin yin luwaɗi da yaro a Zariya
• Lantarki: Za a gina babbar tashar ‘Sola’ a kowace jiha a Arewa

Gwamnan, ya bayyana cewa wannan matakin na daga cikin manufofin gwamnatinsa na inganta rayuwar ma’aikatan jihar.

Ya ce, “Mun amince da Naira 71,000 a matsayin sabon mafi ƙarancin albashi a Jihar Kano don inganta rayuwar ma’aikata.”

Wannan sabon albashin zai fara aiki daga watan Nuwamba, wanda zai ƙara yawan albashin da gwamnatin ke biya da Naira biliyan shida a matakin jiha da kuma Naira biliyan bakwai a matakin ƙananan hukumomi.

Gwamnan, ya ƙara da cewa ƙarin da aka yi wa malamai 20,737, ya sa an samu ƙarin Naira miliyan 340 a albashinsu.

Ya gode wa kwamitin mafi ƙarancin albashi kan aikin da suka tare sa gabatar masa da rahotonsu, wanda ya kai ga tabbatar da ƙara albashin ma’aikatan jihar.