Abin lura ga masu jefa kuri’a

Daga  danjuma  Katsina Wani  Aboki  na, wanda  ya yi  shekaru 14 yana aikin soja kwatsam  ya ajiye  ba  shiri, ya  kuma  fice  daga  gidan  da yake  na soja  tun  kafin a  maido  masa da amsar  takardarsa  ta ajiye aiki. Ya  shaida  mana  cewa, abin  da  ya  sa  ya ajiye aikin, shi ne, wata  rana  yana […]

Daga  danjuma  Katsina

Wani  Aboki  na, wanda  ya yi  shekaru 14 yana aikin soja kwatsam  ya ajiye  ba  shiri, ya  kuma  fice  daga  gidan  da yake  na soja  tun  kafin a  maido  masa da amsar  takardarsa  ta ajiye aiki. Ya  shaida  mana  cewa, abin  da  ya  sa  ya ajiye aikin, shi ne, wata  rana  yana zaune  aka  zo  da jadawalin wadanda za a  tura fagen  daga a  fadan da  ake yi  a yankin  Maiduguri  da Yobe. Duk sojan da  aka dauka  sun san  fada, sun kuma  halarci  yaki  a wasu kasashe  karkashin  Majalisar  dinkin  Duniya  da  kuma  Tarayyar Afrika (AU). Don haka  ko lokacin  da aka ce  za a  tura  su  da  zumudi  da karfin gwiwa  suka  tafi.
‘Ni’  inji  sojan na ji  haushin  da ba ni a ciki. Domin  don kishi na shiga  aikin, ba domin  albashi ba. Kwatsam wadannan  abokan nawa  sai suka rika aiko mana  da  sakon  waya,  cewa,  sun  rasa  gano hakikanin matsalar d ake tattare da wannan yaki.  Ya  rika kawo man wasu  tsare-tsare  da    kalmomin  soja, wadanda  ni  ban sansu  ba.  A  takaice dai  zan ce kawai  sun je  aiki, amma  akwai matsala.
Mai  ba ni  labara, ya ce  wadannan  jaruman  wasu  gawarwaki ne aka  kawo, wasu  kuma  har  zuwa  lokacin rubuta  labarin nan  suna  amsar magani  a asibiti. Abin  takaici  asibitin ma  maganin  wani  lokaci sai  an  yarfe  gumi.
Sojan  ya  ci gaba  da  cewa, daga  cikin  sojan wadanda aka  kashe, akwai wanda  na fi  kusa  da shi. Mutum  ne  mai  son addini, kuma mai  kula da  iyalinsa. Iyalinsa  abin misali ne  a  duk  barikin wajen tarbiyya da tsafta da  kwanciyar  hankali.
Wani abin takaici da na ji,  matar  nan ta  marigayi  tana  bin maza  don  ta  iya rike  gidan. Don  babu  abin da  hukumar  soja ta yi  musu. Wata  rana na  dawo  sai  na ga  daya  daga  cikin  ’ya’yan marigayin  wanda  lokacin  da  marigayin na da  rai  abin  sha’awa ne, ga kowa, amma  ya yi baki  kudaje  na  bin  hancinsa da bakinsa. Yana  gani na  ya rugo  wajena.ya ce  don  Allah in biyo  ka  mu ci abinci? Na hau  sama  a dakina  da shi, na  sanya  aka yi masa  wanka, aka  canza
masa  kaya,  aka kuma ba shi  ya ci,  ya koshi.
Sai tunani  ya fara shiga ta, a cewar sojan nan, ‘shin  sojojin kasar nan ragwaye ne? Amsa ‘a’a,  su ne  suka karfi a  Yammacin  Afirka, don suna daga cikin  wadanda suka  taka  rawar  samar da  zaman  lafiyar  duniya. Kullum  suna  akan  manyan tituna  don kare  rayukan al’umma .
Duk  martabar  da wadannnan  soja suke da  ita  an  ja ta  kasa an walakan tata. An  maida  rayuwarsu  kamar  ta  kiyashi, an  watsar  da kwarjininsu; an  wofintar  da  izzarsu. Mai  ba ni  labari ya ce ban san  lokacin  da  idona ya  cika  da  kwalla ba.
Na  kalli  yadda  yaron  da aka kashe  mahaifinsa  rayuwarsa ta  koma. Ban  san  lokacin da na dauko  biro da  takarda na rubuta  takardar  aje aikina  da niyyar  zan  dawo  duk ranar  da  martabar  soja ta dawo.
Ga  wanda  zai  jefa  kuri’a yana da kyau ya dauko hoton yadda  sojojinmu suka  koma a yanzu. Sannan  ya  jefa, inda zai tambayi kansa ko a haka  za a cigaba?
Wasu  gungun  jami’an  tsaro da  aka yi wa  kisan  gilla  a Jihar Nasarwa a hanyarsu ta zuwa  kamo  wani  da ake  zargi kwanton bauna aka yi  musu,  aka  yi musu  kisan  wulakanci, inda rahotani,  suka nuna  adduna da  barandami  aka yi ta  sassabarsu, har  suka  mutu  kamar  yadda ake  sassaben  ita ce, har  yanzu  ba  wanda  aka  kama. Ba  wanda  aka kai  kotu  bisa  tuhuma. Iyalansu  sun  zama  gwagware  ’ya’yansu  sun  zama  marayu. Alkawuran da  aka yi  wa  iyalansu  har  yanzu  suna  ta  jeka- ka dawo  ba  labari. Hakkin  mazajen  su  kullum  sai  ba suke. Ana  ku dawo  gobe. Idan za ka  jefa  kuri’arka  ka  tuna da  wannan. Da  a irin  haka  wa zai sadaukar  da  ransa ga kasarsa?
Ka tuna  da  yadda  wajen  tsare  motocinmu  domin  bincike  suka zama asusu; ada  idan za a amshi  wani abu  a boye  ake yi,  yanzu  kuwa kai tsaye  ake yi. Kusan  kowace  karamar  hukuma  sai  ’yan  sanda  sun fito  don  samun  na  sawa  bakin salati.  Ka  tuna  wannan in za ka  jefa  kuri‘arka. Yayin  da  jami’an  tsaron kasar  Martabarsu ke  tsiyayaya kamar indararo. Sai  su  kuma ‘jami’an tsaron’ suke ganin  ya kamata su bi  da  daukar matakai  don rike ‘’darajarsu’’?  
Don  haka  sai suka  ga  kawai dole  su  bude ma  fararen  hula  ido  su nuna masu cewa  lallai  fa  sune  ke da iznin  rike  makami  suke da  ikon kamawa  da daurewa. Dama  kashewa  suce  wani  dalili  ya  kawo mutuwar.
Da  wannan  duguzum  din  rayuka  da yawa  sun salwanta wanda yawansu  ya  nunnunka na  jami’an tsaron da  aka kashe a  wajen  cika ayyukansu.  Ya  yan[wadanda  jami’an tsaro suka kashe] sun  zama marayu  ba  kudin  inshora ko na ajiye aiki.  Matansu  sun zama gwagware.
Idan  zaka  jefa  kuri’a, ka  tuna  yadda  kasar ta  koma babu  tsaro da ke  da tabbas  ko dai  mai  tsaron kowanda  ke  tsaron. Ko tsaron koma  tsarewar. Idan  za ka  jefa  kuri’arka  ka  tuna  labarin  wasu  yara guda  uku dake  karatu  a  kasashen  ketare  karatun nan  zai  amfani  kasar  su da  cigabansu amma  aka  kama su  da cikin fararen  kaya  ranar jumma a.da  su  da  yan uwansu  mutum  talatin  duk aka  bindige yaran ukkun  ’ya‘yan  mutum  daya ne; uwa  daya  uba, ’ya’yan  Shiek  Ibrahim  El-Zak-zaky da sauran ’yan gidaje daban-daban, wadanda har yanzu  babu  bincike, ba wanda  aka kama.
Idan  za ka  jefa  kuri’arka  ka sani  shi  girgijen  zalunci  yawo yake yi. Idan ba ka yi  maganinsa ba  wata  rana  bisa kanka zai  zubar da  ruwansa. Idan  za ka  jefa  kuri’arka,  ka yi tunani kada a yi maka romon baka ko wani dadin  baki. Domin dagulewar al’amuran kasa ne abin lura ga masu jefa kuri’a.
Danjuma Katsina. Danjarida ne,  marubucin  za a iya tuntubarsa ta [email protected]  08035904408.