Amarya ta sha da kyar a hannun ’yan bindiga lokacin da ake kokarin kai ta gidan miji

Dole amaryar ta cire kayan bikin, ta ranta a na kare cikin daji

Wata amarya a Jihar Neja ta cire rigar bikinta sannan ta ranta a na kare tsawon kilomitoci a cikin daji don guje wa harin ’yan bindiga.

Rahotanni sun nuna maharan sun farmaki amaryar ne lokacin da ake shirin kai ta gidan mijinta.

• Dan shaye-shaye ya kashe mahaifiyarsa ta hanyar shake ta
  Tallafin N8K: Tinubu ya sauya shawara

Aminiya ta gano cewa an dauki amaryar ce daga wani kauye a Karamar Hukumar Paikoro, inda za a kai ta Kuta, hedkwatar Karamar Hukumar Shiroro, amma maharan suka tare tawagarta a daidai garin Kaffin-Koro da ke Karamar Hukumar Paikoro ta Jihar.

Wata ’yar uwar amaryar da ta bukaci a sakaya sunanta ta shaida wa wakilinmu cewa, “Mun dauki amaryar ne daga kauyenmu za mu kai ta Kuta. Muna kan hanya ne sai ’yan bindiga suka kai mana hari a daidai garin Kaffin-Koro.

“Amaryar na sanye da rigar bikinta a daya daga cikin motocin da ke baya a lokacin, nan take sai ta cire ta. A nan ne ’yan bindigar suka tarwatsa mu zuwa cikin daji.

“Sun sace kawayen amarya su biyu, amma su ma daga bisani sun tsere, dole aka dage bikin ba a kammala shi ba,” in ji ’yar uwar amaryar.

Amarya da angon dai duka sun ki yarda su yi magana da ‘yan jarida a kan lamarin, amma majiyoyin da ke da kusanci da su sun ce suna cikin kaduwa sosai.