An dakatar da basarake kan yin liki da takardun Naira a Ogun

Masarautar Egba da ke Jihar Ogun ta dakatar da Olu na Owode da ke Karamar Hukumar Obafemi/Owode, Oba Kolawole Sowemimo, saboda wulakanta takardun Naira.

Majalisar Masarautar Egba, karkashin jagorancin Alake na Kasar Egba, ta dakatar da Olu na Owode daga sarauta ne bayan da wani bidiyonsa ya karade gari, wanda a ciki yake yi wa wani mawaki liki da takardun Naira a wurin wani biki.

A cikin bidiyon kuma, an ga basaraken da wata igiya da aka hada da takardun Naira 1,000, ya nada wa fitaccen mawakin kasar yarbawa, Wasiu Ayinde, wanda aka fi sani da KWAM 1.

A watan da ya gabata ne Hukumar Wayar da Kan Jama’a ta Kasa (NOA) ta rubuta wa basaraken wasika cewa ce abin da ya yi zai iya sa a daure shi.

• Dillalan magani sun shiga yajin aiki a Kano
• An kafa dokar haramta ɓoye kayan abinci a Katsina

A ranar Juma’a kuma Majalisar Masarautar Egba ta sanar da dakatar da shi kan cin mutuncin kudin Najeriya a bainar jama’a, wanda laifi ne a doka.

Majalisar ta dakatar da shi na tsawon watanni biyu ba tare da albashi ba, bayan shawarar kwamitinta na da’a wanda ya bayyana cewa a tsawon wa’adin dakatarwar, an haramta masa gabatar da kansa a matsayin basarake.

Hakazalika an haramata gayyatar sa zuwa kowane irin sha’anin gwamnati ko na al’umma a matsayin sarkin gargajiya, kuma ba za a biya shi ko sisi ba.