An daure mai fyade ga yarinya shekara 7 a jarun

Wata Babbar Kotun Jihar Borno da ke  Maiduguri ta daure wani mutum mai suna Ibrahim Ali dan garin Gamboru Ngala shekara 7 a gidan yari saboda samunsa da laifin yi wa wata yarinya ’yar shekara 7 fyade.Ali, wanda aka gabatar da shi a gaban Mai shari’a Wakil Alkali Gana, ya musanta tuhumar da aka yi […]

Wata Babbar Kotun Jihar Borno da ke  Maiduguri ta daure wani mutum mai suna Ibrahim Ali dan garin Gamboru Ngala shekara 7 a gidan yari saboda samunsa da laifin yi wa wata yarinya ’yar shekara 7 fyade.
Ali, wanda aka gabatar da shi a gaban Mai shari’a Wakil Alkali Gana, ya musanta tuhumar da aka yi masa inda, ya ce mahaifiyar yarinyar ce ke nemansa, amma saboda ya ki yarda da bukatarta, shi ne ta yi amfani da ’yarta domin ta yi masa sharri.
Sai dai likitan da ya duba yarinyar a nasa bangaren, ya fada wa kotun cewa al’aurar yarinyar ba ta nuna alaman kurdawa ba, duk da cewa akwai alamun rauni a kusa da ita.
Da yake yanke hukunci a kan matsalar, Mai shari’a Gana ya ce duk da cewa ana bukatar a tabbatar da kurdawa kafin a tabbatar da hukuncin fyade, mai laifin ya yi wasan sha’awa da yarinyar, inda ya cire mata wando sannan ya kwanta a kanta bayan ya rufe dakinsa. Mai shari’ar wanda ya ce an tabbatar da laifin rashin da’a a kan mai laifin, sannan ya yi amfani da sashe na 217 na kundin hukuncin laifuffuka, ya yanke wa Ali shekara 7 a gidan yari ba tare da zabin biyan tara ba.
“Ina horon iyaye su rika lura da ’ya’yansu da wadanda suke karkashinsu a kan miyagun mutane masu mugayen halaye. Maganar cewa mahaifiyar yarinyar ta yi masa sharri ne saboda ya ki yarda da bukatarta ba gaskiya ba ce saboda babu mahaifiyar da za ta yi amfani da ’yarta wurin aikata irin wannan mummunan aiki,” inji Mai shari’a Gana.