An gano motar da aka sace a Gidan Gwamnatin Kano

An kama wanda ake zargi da satar motar, wanda yanzu haka yana taimaka wa jami’an tsaro wajen bincike.

’Yan sanda a Jihar Kano sun gano wata mota ƙirar Toyota Hilux mallakar ofishin mataimakin gwamnan jihar, Comrade Aminu Abdussalam Gwarzo, wadda aka sace kwanan nan a harabar gidan gwamnati.

Majiyoyi daga fadar Gwamnatin Kano sun ce an sace motar ce cikin dare, lamarin da ya kai ga tsare direban da motar ke hannunsa, Shafiu Sharp-Sharp a matsayin ɗaya daga cikin ababen zargi.

• Gasar Kofin Duniya ta 2026 ita ce ta ƙarshe da zan buga — Ronaldo
• Troost-Ekong ya gargaɗi Super Eagles kan wasan da za ta fafata da Gabon

Sai dai wata sanarwa da ofishin mataimakin gwamnan ya fitar, ta ce jami’an tsaro sun gano motar da safiyar wannan Larabar bayan wani aikin haɗin gwiwa na gaggawa da aka gudanar.

Sanarwar ta ce an kama wanda ake zargi da satar motar, Ya’u Gezawa, wanda yanzu haka yana taimaka wa jami’an tsaro wajen bincike.

Mai magana da yawun mataimakin gwamnan, Ibrahim Garba Shuaibu, ya bayyana lamarin a matsayin cin amanar aiki, tare da jinjinawa ’yan sanda bisa gaggawar da suka yi wajen gano motar da kama wanda ake zargi.