An haramta amfani da lasifika a Masallacin Harami

Sautin sallar jam’i ya takaita zuwa cikin masallaci, an kuma kayyade karar lasifika

Kasar Saudiyya ta haramta yin amfani da lasifikokin da ke waje a Masallacin Harami da sauran masallatai a yayin sallar jam’i.

Ministan Harkokin Musulunci da Da’awa na Saudiyya, Dokta Abudllateef Al Sheikh ya ce an “takaita amfani da lasifikokin da ke wajen [Masallacin Harami da sauran] rassan ma’aikatar zuwa kiran sallah da tayar da Ikama kadai, sannan karar lasifikokin kar ta wuce maki uku na sauti.”

• An yanke wa dattijo lafiyayyar kafa aka bar mai ciwon
• Masu zanga-zanga sun kone caji ofis a Neja

Ma’aikatar ta ce umarnin ya dace da fatawar Sheikh Muhammad bin Saleh Al-Uthaymeen da kuma Sheikh Saleh bin Fawzan Al-Fawzan wanda babban mamba ne a Kwamitin Fatawa, da sauran manyan malamai da suka bayar sama da shekara 20 da suka gabata.

Sanarwar ta ce, “Tun da isar da sautin liman a yayin sallar jam’i ya taikata ne zuwa ga mutanen da ke cikin masallaci, babu dalilin isar da sautin ga mutanen da ke gida.

“Sannan kuma rashin girmamawa ne ga Alkur’ani a sanya karatunsa a lasifika alhali ba a sauraron karatun Alkur’anin da ke fita a lasifikar.”