An harbe mutum bakwai a mashaya a Filato
Mutum bakwai sun rigamu gidan gaskiya a daren ranar Lahadin da ta gabata bayan da wasu ’yan bindiga suka bude wuta a wata mashaya da ke kauyen Ndin da ke yankin Fan a karamara hukumar Barikin Ladi da ke jihar Filato. Mai magana da yawun rundunar ’yan sandan jihar, ASP Tyopev Terna ya tabbatar […]
Mutum bakwai sun rigamu gidan gaskiya a daren ranar Lahadin da ta gabata bayan da wasu ’yan bindiga suka bude wuta a wata mashaya da ke kauyen Ndin da ke yankin Fan a karamara hukumar Barikin Ladi da ke jihar Filato.
Mai magana da yawun rundunar ’yan sandan jihar, ASP Tyopev Terna ya tabbatar da mutuwar mutum biyar sannan mutum uku suna jinya a asibitin kwararru na Filato.
Sai dai mai magana da yawun rundunar Safe Haven, Manjo Adam Umar ya ce daga bisani mutum biyu sun mutu.
Manjo Umar ya bayyana cewa kwamitin kar-ta-kwana na rundunar ya sami kiran gaggawa sannan nan da nan ya kai dauki yanki amma lokacin da suka isa yanki maharan sun tsere.
Ya ce babban kalubalen da suke fuskanta shi ne rashin samun bayanai na hakika daga mazauna yankunan .
Ya bukaci matasa su hada rundunar sintiri wacce za ta rika yin aiki da jami’an tsaro don magance matsalar.