An kashe mayaƙan ISWAP a karon-batta da ’yan Boko Haram a Tafkin Chadi 

Zagazola ya ce kawo yanzu ba a gano haƙiƙanin alƙaluman mayaƙan ISWAP da aka kashe ba.

An kashe wasu mayaƙan ƙungiyar ISWAP masu tayar da ƙayar baya a Afirka ta Yamma yayin wata arangama da ’yan Boko Haram a gabar Tafkin Chadi.

An dai yi fafatawar ce da mayaƙan Boko Haram ɓangaren Bakoura Buduma wanda ake yi wa laƙabi da Abou Umaymah.

• A cikin mummunan ƙunci muka yi Sallar bana — Talakawa
• ISWAP ta kashe ɗan sanda a Borno

Bayanai sun ce rikicin da ya kai ga artabun ya faru ne a tsibirin Kukiri da Lelewa da ke gabar Tafkin Chadi a Jamhuriyar Nijar.

Wata majiya mai tushe ta shaida wa Zagazola Makama, ƙwararre kan harkokin tsaro a yankin Tafkin Chadi cewa an soma karon-battar ne a  Yammacin ranar Alhamis, 11 ga Afrilun 2024.

Majiyar ta ce Abou Umaima ya jagoranci mayaƙan da suka dira a sansanin Lelewa da na Gadira a Bosso da ke yankin Diffa na Jamhuriyar Nijar.

Ta ce mayaƙan sun ƙaddamar da farmaki a sansanin inda suka kashe mayaƙan na ISWAP da dama.

Sai dai rahoton na Zagazola ya ce kawo yanzu ba a gano haƙiƙanin alƙaluman mayaƙan ISWAP da aka kashe ba.