An Kashe Sakataren Yada Labaran APC Na Filato 

Mahara sun harbe Sakataren Yada Labaran Jam’iyyar APC na Jihar Filato, Sylvanus Namang, har lahira

Wasu da ba a san ko su wane ne ba sun harbe Sakataren Yada Labaran Jam’iyyar APC na Jihar Filato, Sylvanus Namang, har lahira a Karamar Hukumar Pankshin da ke jihar.

Wani jigo a jam’iyyar da ya nemi a sakaya sunansa, ya shaida wa wakilinmu ta wayar tarho cewa Namang ya rasu ne sakamakon raunukan da ya samu a harin da aka kai masa a garin Pankshin.

An kashe Namang ne a wajen dakin otal dinsa da ke yankin inda ’yan bindigar suka bude masa wuta da misalin karfe 7:30 na safe ranar Asabar.

Majiyar ta shaida wa Aminiya cewa marigayin ya bar gida ne a ranar domin halartar jana’izar da aka yi a Pankshin inda ya gamu da ajalinsa.

• Kwastam ta kama manyan motoci 15 na kayan abinci a Sakkwato
• Hukumar kwastam ta yi gwanjon motoci 462

Ya kara da cewa Marigayi Namang ya kasance amintaccen mutum mai kishin ci gaban APC a dukkan matakai.

A cewarsa, jam’iyyar na shirin bayar da sanarwa dangane mutuwar.