An rataye jagoran babbar Jam’iyyar Musulunci ta Bangaladesh

kasar Bangaladesh ta zartar da hukuncin kisa a kan jagoran Jam’iyyar Musulunci mafi girma a kasar, Sheikh Moti’urr Rahman Nizami ta hanyar ratayewa, a babban gidan yari na Dhaka, babban birnin kasar.Sheikh Moti’urr Rahman Nizami ya shafe shekara 15 yana shugabancin jam’iyyar ta Jama’at-e-Islami, inda ya kasance na hudu cikin jerin shugabanin Jam’iyyar Jama’at-e-Islami da […]

kasar Bangaladesh ta zartar da hukuncin kisa a kan jagoran Jam’iyyar Musulunci mafi girma a kasar, Sheikh Moti’urr Rahman Nizami ta hanyar ratayewa, a babban gidan yari na Dhaka, babban birnin kasar.
Sheikh Moti’urr Rahman Nizami ya shafe shekara 15 yana shugabancin jam’iyyar ta Jama’at-e-Islami, inda ya kasance na hudu cikin jerin shugabanin Jam’iyyar Jama’at-e-Islami da aka aiwatar da hukuncin kisa a kansu a ‘yan shekarun da suka wuce.
An samu Mista Nizami, mai shekarA 73 da aikata laifuffukan cin zarafin dan Adam a lokacin yakin da Bangaladesh ta yi na neman ’yan cin kai daga kasar Pakistan a 1971.
A ranar Litinin Kotun koli ta Bangaladesh ta yi watsi da wani roko na karshe na a sake duba hukuncin kisan da aka yanke wa shaihin malamin. Kuma hakan ya sa aka rataye Nizami da misalin karfe 12:01 na daren shekaranjiya Laraba.
Hukumomin kasar sun tura karin ’yan sanda da masu tsaron kan iyaka zuwa birnin Dhaka da sauran manyan biranen kasar don tsaurara tsaro saboda Jama’at-e-Islami ta yi kiran yajin aiki na kasa a jiya Alhamis don nuna fushi da zartar da hukuncin.
Irin wannan hukunci da aka yanke a baya ya jawo tashin hankain da ya haddasa asarar rayukan mutum 200 galibinsu magoya bayan kungiyar da kuma ’yan sanda.