An yi garkuwa da Kodinetan Hukumar Albashi ta Ƙasa a Zamfara

’Yan bindiga sun yi garkuwa da Kodinetan Hukumar Tsara Albashi ta Ƙasa a Jihar Zamfara, Alhaji Bashir Abara Gummi tare da wasu matafiya a kan babbar hanyar Funtua zuwa Gusau

’Yan bindiga sun yi garkuwa da Kodinetan Hukumar Tsara Albashi ta Ƙasa a Jihar Zamfara, Alhaji Bashir Abara Gummi tare da wasu matafiya a kan babbar hanyar Funtua zuwa Gusau.

’Yan ta’addan tare babbar hanyar ne a ranar Lahadi, inda suka yi abin gaba da matafiya da dama, ciki har da shi.

Wasu majiyoyi tsaro sun bayyana cewa a lokacin harin, ’yan ta’addan sun buɗe wa motocin da ke wucewa a hanyar wuta, ind suka kashe wasu mutum biyu kafin su yi awon gaba da Alhaji Bashir da sauran matafiyan.

Alhaji Bashir Abara Gummi ya faɗa a hannun ’yan ta’adda ne a lokacin da yake kan hanyarsa ta zuwa Abuja aiki, a cewar wani jami’in hukumar.

• NAJERIYA A YAU: Shin Sai Da Kuɗi Mai Yawa Za Ku Iya Cin Abinci Mai Gina Jiki?
• Abba ya bai wa Sarkin Gaya sandar mulki

Sai dai Babban Mai Binciken Kuɗi na Jihar Zamfara, Alhaji Abubakar Dan Maliki, ya tsallake rijiya da baya, bayan da ya samu tserewa a lokacin harin.

Wakikinmu ya gano cewa motarsa ta iso wajen be bayan da ’yan bindiga suka tare rukunin farko na motoci, amma ya yi sauri ya juya kuma ya tsere.