Badakalar N2.9bn: Kotu ta ba da belin Okorocha kan N500m

An ba da shi beli a ranar da za a tantance shi a matasyin mai neman takarar shugaban kasa

Kotu ta bayar da belin tsohon Gwamnan Jihar Imo, Sanata Rochas Okorocha, a kan Naira miliyan 500 tare da kwace takardar fasfo dinsa.

Babban Kotun Tarayya da ke zamanta a Abuja ta kuma shardanta wa Okorocha, mai neman takarar shugaban kasa, da ya kawo mutum daya da zai tsaya mishi kuma ya ajiye Naira miliyan 500.

• Me Tinubu ya fada wa kwamitin tantance ’yan takarar APC?
• NAJERIYA A YAU: Yadda Tsawaita Lokacin Kamfe Na Zaben 2023 Zai Shafi ’Yan Najeriya

Daliban firamare sun fara shiga kungiyoyin asiri a Ogun — Gwamna

Babbar kotun ta bayar da belin ne a ranar da Okorocha zai bayyana domin tantancewa a gaban kwamitin tantance masu neman takarar shugaban kasa na jam’iyyar APC.

Hukumar Yaki da Karya Tattalin Arziki (EFCC) ce ta gurfanar da Okorocha a gaban kotun bisa zargin almundanar Naira biliyan 2.9 a lokacin da yake kan kujerar Gwamnan Jihar Imo.

Alkalin kotun, Mai Shari’a Inyang Ekwo, ya ce dole ne duk mutumin da zai tsaya wa Okorocha ya kasance mallaki gida a Abuja, sannan ya damka wa kotun takardun mallakar filin.

Mai Shari’a Inyang Ekwo ya bayar da belin ne a ranar Laraba a tare da haramta wa Okorocha fita daga Najeriya ba tare da samun izinin kotu ba.

Kotun ta dage ci gaba da sauraron shari’ar zuwa ranar 7 zuwa 11 ga watan Nuwamban 2022, bayan ta ba da belin mutumin da hukumar EFCC take tuhuma tare da Okorocha, Anyim Chinenye.