Benzema, Mbappe da Messi na takarar gwarzon FIFA na 2022

FIFA za ta gudanar da bikin karrama gwarzonta a ranar 27 ga watan Fabrairun 2023.

Hukumar Kwallon Kafa ta Duniya FIFA, ta bayyana Karim Benzema da Lionel Messi da Kyalin Mbappe a matsayin masu takarar gwarzon dan kwallon kafa na duniya na 2022.

Ana iya tuna cewa, Benzema na da kwallo 15 da ya ci a Gasar Zakarun Turai na Champions League da ya kai Real Madrid ta lashe kofin na 13 jumulla.

Shuraim ya yi murabus daga limanci a Masallacin Harami

CBN ya wadata Najeriya da sabbin takardun kudi ko a ci gaba da juya tsofaffi —Majalisar Koli

Haka kuma tsohon dan kwallon tawagar Faransa shi ne kan gaba a yawan zura kwallaye a raga a La Liga a bara.

Shi kuwa Mbappe, wanda PSG ta lashe Ligue 1 a bara ya ci kwallo 26 a wasa 46 da ya yi wa kungiyar Faransa.

Ya kuma taka rawar gani a Gasar Kofin Duniya da aka yi a Qatar, inda ya lashe takalmin zinare  na gasar a matsayin dan wasan mafi zura kwallaye.

Mbappe ya yi bajintar gaske inda ya ci kwallo uku a wasan karshe na Gasar Kofin Duniya da Argentina ta yi nasara a bugun fenariti.

Messi kyaftin din Argentina babu laifi ya dan tabuka taka rawar gani a PSG tun bayan da ya koma Faransa da taka leda daga Barcelona a 2021.

Ya bayar da gudunmuwar da PSG ta lashe Ligue 1 a kakar farko da ya buga mata tamaula.

Shi ne ya ja ragamar Argentina ta lashe Kofin Duniya, kumq shi aka bai wa fitaccen dan wasa a babbar gasar tamaula ta duniya ta 2022.

Za a karrama fitaccen dan wasan tamaula na duniya a bana, kan rawar da ya taka tsakanin 8 ga watan Agustan 2021 zuwa 18 ga watan Disambar 2022.

Za a sanar da gwarzon dan kwallon kafa na duniya na FIFA a bikin da za a gudanar ranar 27 ga watan Fabrairun 2023.

An tace ukun daga 14 da aka bayyana a baya, inda aka sa wasu kwararru suka tankade su zuwa ukun karshe da za a fidda gwani.

Za kuma a gudanar da zaben tsakanin koci-koci na tawagar mambobin FIFA da kyaftin-kyaftin da wasu ’yan jarida da kuma kada kuri’a a yanar gizo ta FIFA.