Bikin gasar sarauniyar kyau ta duniya ya samu cikas

Bikin gasar sarauniyar kyau ta duniya karo na 63 da aka shirya gudanarwa a Indonesiya ya samu cikas, inda daruruwan Musulmin kasar suka yi alla-wadai da shi ta hanyar gudanar da zanga-zanga.Da farko an shirya fadar sakamakon wacce ta lashe kambin sarauniyar kyau ta duniya a dakin taro na Sentul International Conbention Center da ke […]

Bikin gasar sarauniyar kyau ta duniya karo na 63 da aka shirya gudanarwa a Indonesiya ya samu cikas, inda daruruwan Musulmin kasar suka yi alla-wadai da shi ta hanyar gudanar da zanga-zanga.
Da farko an shirya fadar sakamakon wacce ta lashe kambin sarauniyar kyau ta duniya a dakin taro na Sentul International Conbention Center da ke Jakarta babban birnin kasar a ranar 28 ga watan Satumba, amma bayan zanga-zangar sai aka mayar da bikin birnin Bali daya daga cikin manyan garuruwan kasar marasa tsattsauran ra’ayin addini.
An fara gudanar da bikin ne a ranar 8 ga watan Satumba inda matan da za su fafata 130 suka yi shigar kasar Indonesiya mai suna Nusantara, sannan suka yi tafiyar mage.
Yayin bikin an gudanar da kade-kade da raye-raye da kuma wake-waken kasar Indonesiya.
Sai dai ko bayan an mayar da shi Bali an ci gaba da gudanar da zanga-zanga, inda wadanda suka shirya bikin suka ce zai yi matukar wahala a ci gaba da bikin a Bali, inda kuma ake kokarin mayar da shi Jaba.
A yanzu an fara rade-radin za a mayar da shi yankin da kabilar Hindu suke da rinjaye a kasar.
“Al’amarin ya cukurkude, ban kuma yi tsammanin bikin zai samu nasara a Bali ba.” Inji Nana Putra, Babbar Daraktar shirye-shirye da watsa biki ta kafafen sadarwa ta shaida wa kamfanin dillancin labarai na AFC.
A yanzu dai babu tabbacin takamaiman wurin da za a sanar da sakamakon karshe a ranar 28 ga watan Satumba.