Coronavirus: Atiku ya bukaci a maida hankali a Kano

Tsohon mataimakin shugaban kasa, Atiku Abubakar ya bukaci gwamnatin tarayya da sauran hukumomin da suke taka rawa a yaki da cutar coronavirus a Najeriya da su hada hannu da gwamnatin jihar Kano wajen dakile yaduwar cutar a jihar. Atiku Abubakar, ya ce akwai bukatan hukumomi su maida hankali akan annobar a Kano saboda kiyaye yaduwar […]

Tsohon mataimakin shugaban kasa, Atiku Abubakar ya bukaci gwamnatin tarayya da sauran hukumomin da suke taka rawa a yaki da cutar coronavirus a Najeriya da su hada hannu da gwamnatin jihar Kano wajen dakile yaduwar cutar a jihar.

Atiku Abubakar, ya ce akwai bukatan hukumomi su maida hankali akan annobar a Kano saboda kiyaye yaduwar ta zuwa jihohi masu makwabtaka da ita da kuma sauran jihohin Arewacin kasar.

Tsohon mataimakin shugaban kasar ya  bayyana hakan ne a wani sako da ya fitar a ranar Juma’a ta hannun mai ba shi shawara kan yada labarai, Paul Ibe inda ya ce lamarin a Kano zai kasance zakaran gwajin dafi akan nasarar da ake samu a yaki da cutar a Najeriya.

Ya kara da cewa, ya kamata a yi kokarin bayar da cikakken bayani akan halin da ake ciki saboda kwanciyar hankalin jama’ar Kano.

• Yadda kamfanin Gotel na Atiku ya sallami ma’aikata 54
• Darussa uku da na koya a killace —Dan Atiku Abubakar
• Coronavirus: Atiku ya jajanta wa Abba Kyari

Ya kuma bukaci ‘yan Najeriya da su dauki matakan kariya kamar yadda hukumomin yaki da cutar suka zayyana a daidai lokacin da ake shirin sassauta dokar zaman gida.

Atiku Abubakar, wanda shi ne dan takarar shugaban kasa a karkashin tutar babbar Jam’iyyar adawa ta PDP a zaben shekarar 2019, ya kuma jajantawa iyalan Chief Raymond Dokpesi wadanda suka harbu da cutar Coronavirus.