Dalilin da ya sa muke fito da sabbin jarumai -Sunusi Oscar

Jarumai a su ne kashin bayan Kannywood, idan furodusa ya rasa su to ya shiga wani hali.

Fitaccen darakta a masana’antar Kannywood, Sunusi Hafeez wanda aka fi sani da Sunusi Oscar 442 ya ce ya zama dole su dage wajen nemowa tare da fito da sababbin jarumai domin ci gaban masana’antar baki daya.

Daraktan, wanda shi ne uban gidan jarumai irinsu Garzali Miko da Mommee Gombe da sauransu matasan jarumai, ya bayyana  hakan ne a zantawarsa da Aminiya ta wayar tarho, inda ya ce jarumai a su ne kashin bayan masana’antar.

“Shi jarumi kadara ne wajen kowane darakta ko furodusa.

“Daga lokacin da darakta ya rasa jarumin da zai yi aiki, yana shiga cikin wani hali.

“Sau da yawa za ka ga fina-finanmu suna kama da juna saboda rashin wadatan jarumai. Mutum ya cancanta ko bai cancanta ba, haka za ka hakura ka sa shi saboda babu wasu.

“Saboda haka ne muke ta kokari wajen fito da sabbin jarumai maza da mata, wanda duk yake da sha’awar yin fim da su, zai kalla ya ga wanne ne ya dace da labarinsa ya sa shi.

Wannan ne burinmu. Idan babu jarumi, shi kanshi darakta bai da amfani”, Inji ta Sunusi Oscar.

Ya kuma yi kira ga masoyansu da su rika jan hankalinsu cikin hikima da basira idan suka yi kuskure, ba tare da zagi ko cin mutunci ba.

“Mu ma mutane ne kamar kowa. Za mu iya yin daidai, za mu yin ba daidai ba. Idan mun yi kuskure, to a ja hankalinmu ne”, inji shi.