Dubun masu damfara a ATM ta cika a Jigawa

An kama su bayan sun ciri kudi daga asusun bankin mutumin da suka damfara.

’Yan Sanda sun cafke wasu ’yan damfara da suka yi wa wani mutum aika-aika a injin cirar kudi (ATM) a garin Dutse, babban birnin Jihar Jigawa. 

An kama masu damfarar ne bayan mutumin da suka damfarar har suka kwashi kudi a asusun bankinsa ya kai kara caji ofis ranar Laraba.

• An kama katan 185 na maganin karfin maza a Kano da Jigawa
• Makarantar Dutse Model ta shirya gasar wasanni

Jami’in Hulda da Jama’a na ’Yan Sandan a Jihar Jigawa, Lawan Shisu, ya shaida wa manema labarai cewa ’yan damfarar sun saci Naira 58,000 daga cikin asusun ajiyar mutumin kafin a kama su.

Ya ce miyagun sun samu damar yi wa mutumin zamba ne bayan sun nuna masa kamar taimakon shi za su yi.

Ya ce a halin yanzu wadanda ake tuhumar na tsare a hannun ’yan sanda ana ci gaba da bincike.