Gagarumar gararumar Girgoriya (2)
Safiyar shigowar sabuwar shekarar Girgoriya, wato dubu karamin lauje da sili da manuniyar kasa, an samu wani ba’ari na abokan huldata da suke ta cillo mini da sakonni fatan alheri, inda mafi yawansu ke nuni da hankoron samun MABUDIN MAGARKAMAR MABUBBUGAR MAMAKO a wajen GIRBAR GORIYAR GARKAR GAYAUNAR GAGARUMAR GIRGORIYA; wadansu kuwa sun dora lamarin […]
Safiyar shigowar sabuwar shekarar Girgoriya, wato dubu karamin lauje da sili da manuniyar kasa, an samu wani ba’ari na abokan huldata da suke ta cillo mini da sakonni fatan alheri, inda mafi yawansu ke nuni da hankoron samun MABUDIN MAGARKAMAR MABUBBUGAR MAMAKO a wajen GIRBAR GORIYAR GARKAR GAYAUNAR GAGARUMAR GIRGORIYA; wadansu kuwa sun dora lamarin a tafarkin addini. Ko ma dai mece ce manufar wadannan sakonni ina ganin babu laifi in an yi kirgar kwanakin shekaru, illa dai kawai duk wanda ya dora kidayarsa kan turbar addini, wajibi ne a gare shi/ta a ga aikin da’a da kyakkyawar dabi’a, ta hanyar yi wa miyagun laifuffuka bara’a, ta yadda kowace irin baran-barama da barusa za mu nusar da ita nunin a’a!
Kuma duk wanda ya ziyarce shi/ta to ya yi arba da fuskoki cike da fara’a, wadanda ke cike da walwala babu ba’a.
An dai yi bukukuwan bude babin bini-binin rayuwa. Uhm! Bidiri! Birede! Biredi!
Shagalallu dai ba abin da suka durfafa illa laluben maski-maskin GAGARUMAR GARARUMAR GIRGORIYA. Haurobiyawa dai sun himmatu wajen kwasar GANIMAR GUMURZUN GIRGORIYA; da GABJEJEN GORO GORIYA. Masu hankalin hannun taguwa dai suna nan suna ta wautar wala-walar watangaririyar wulkitawar wuntsila gudi-gudin wa-ka-ci-ka-tashi.
Muna nan dai muna ta NANNAGA NAKIYAR NEME-NEMEN NI’IMAR: Jawo-wuri a watan Janjanin Janye-wuri; da fara’ar fuskokin furanni a furkaniyar farin cikin watan Farin-biri; da murmusa marsa a marisar watan Maris; da fiffukar wata A-farin-lilo; da maitar mayatar mayun watan Mayu; da yawon-wuni babu wuni-wuni; da Yawon-wulli; da watan ruwan Agusta; da satun sassaben-Baba; da Noman-Baba; da Dashen Baba
Daukacin wannan bambamin batutuwa babu bugi-in-buga balle banga-banga.
Tuni dai aka yi HAKILON HARAMAR HIJIRIYYA, al’amarin da ya haifar da HANKORON HARAMTA HARAM da HANKALIN HALATTA HALALIYA.
Don haka ina fatan mabiya addinai za su daga murya wajen hani da fashe-fashen nakiyoyin bogi da ke tayar da hankulan al’umma. Kai hasali ma na ji cewa, ‘wadansu da ba BARADEN BURKA BINDIGA ba suna ta harbe-harbe, kamar za su jiyar da na-zomon bebe, alhali babu abin da za su iya yi, illa dai kawai su sanya babe (namijin fara) ya tashi sama.
Haurobiyawa a yi kidayar kwanaki da kokarin cika alkawuran ayyukan raya kasa, musamman ga jiga-jigan al’umma da aka jinka wa KWAGIRIN KWANTIRAGIN KWANGILAR KARADE kasa da managartan gyare-gyare, amma ba ’yan GYARE-GYARE IRIN NA GYARE DA KUREGE ba.
Su kuwa gama-garin mutane irinmu, abin da a koyaushe na saba nusar da mu shi ne, A BI DOKA don ka da kowa ya KOKA cikin rani damina da KAKA. Uwa-uba a kawar da JUHALA a tabbatar da ADALA, don gudun kada wadansu su yi ta DAFDALAR DANNE DAMIN DALA, alhali wadansu sun karke da salallamin LALALA!
Duk inda ake bin LAYI kowa ya bi, amma in an samu mai LAULAYI, wajibi ne a daga masa/mata kafa, don gudun kada cuta ta yi kaye.
Haurobiyawa rashin bin KA’IDA, shi ya hana mu samun FA’IDA a daukacin fadin Haurobiya, ta yadda tsawon shekaru ake ta fama da bara-gurbin batagarin SAMARIN KUSU DA ’YAN MATAN JABA DA GAFIYA.
Haurobiyawa hakika mun ga tasku a tsawon shekarun da aka kwashe ana tsuwurwurta tsarin DAMO-DA-KURA-DA-DIYYA, wato tun daga shekarar alif sili da manuniyar kasa da ta kasa da ta kasa, inda kasarmu ta yi ta yin kasa-kasa, har Mai-duka Ya kawo mana mulkin BABAN-BURIN-HURIYYA. To muna sa ran dai TSINKAYEN TSINTSIYARSA za su yi TSAYIN TSABTACE mana jibgin jibar da aka jibga mana a tudu da kwarin kowane sako na kasarmu kwata.
Bisa la’akari da al’amuran da aka tsuwurwurta tsawon shekarun da suka gabata, muna fatan Gwamnatin Baban-burin-huriyya za ta hada karfi da karfen karafan titin tarago na layin dogo, ba tare da bata lokutan wulwulawar agogo ba, wajen aiwatar da gagarumin gyara a sabuwar shekara, don ribatar GAGARUMAR GWAGGWABAR GANIMAR GORIYAR GORON GIRGORIYA, wanda zai haifar wa Haurobiyawa MABUDIN MAGARKAMAR MABUBBUGAR MAMAKON MARKA-MARKAR MUTUNTA MUTANE, ta yadda za mu kasance baibaye DA LULLUMIN LUMANA LULLUM, kuma kada kowa ya ce ko IHIM, sai dai mu ji UHM!
***************
Kira da karajin muryar
’Yan makaranta a Gwangwaje a sabuwar shekara, amma ban da gwabje-gwabje, uwa-uba bisa la’akari da karatowar zabukan dubu karamin lauje da sili da manuniyar kasa, ana jan na-zomon masu fuka-fukin tashi da su kiyayi GWANJON GWANGWAJEWAR GANYEN GAYE! A KULA!