Gidauniyar Ultimate Foundation ta bai wa marasa lafiya tallafin kudin magani a Katsina
A ranar asabar din da ta gabata ne gidauniyar Ultimate Foundation da ke Jihar Katsina ta kai tallafi ga marasa lafiya a babban asibitin Katsina. Marasa lafiya da ke bangaren hatsari da ikin gaggawa su ne suka shaida wannan tallafi. Daga babban asibitin garin Katsina, sai gidan yari inda nan ma ta kai musu gudumawa […]
A ranar asabar din da ta gabata ne gidauniyar Ultimate Foundation da ke Jihar Katsina ta kai tallafi ga marasa lafiya a babban asibitin Katsina. Marasa lafiya da ke bangaren hatsari da ikin gaggawa su ne suka shaida wannan tallafi.
Daga babban asibitin garin Katsina, sai gidan yari inda nan ma ta kai musu gudumawa da kuma wata Makarantar Firamaren Islamiyya ta Kayalwa Inda suka kai musu katan katan na alli da littatafan rubutu.
Ultimate foundation dai wata gidauniya ce da ta fara daga zauren sada zumunta ta WhatsApp Wanda Fadila Sani Tilo, ta kafa daga bisani aka mata rijista da gwamnati ta zama gidauniya da take tallafawa marasa galihu da kuma mabukata.
Bayan kammala ziyarar gidauniyar shugabanta Muhammad Yahya Sayaya, ya bayyana cewa sun yi ziyarar ne a lokacin da gidauniyar ta su ta cika shekara biyu da kafuwa Wanda duk shekara da irin tsarin da suke bullo da shi na taimako.
A firamare ta kayalwa da yake karbar kyaututtukan daga shugabannin Ultimate foundation shugaban Makarantar Abubakar Mai Kano, jinjinawa gidauniyar Ultimate ya yi na wannan tallafin kayan karatu da suka kawo musu.
Tun farko da take tofa albarkacin bakinta jagorar gidauniyar Hajiya Fadila Sani Tilo, ta ce tana farin cikin na wannan taro da akayi domin tafi kowa murna da farin ciki saboda ita ce ta assasa wannan aikin lada.
Ganin cewa wannan gidauniyar tana da membobi a fadin Najeriya hakan ya sa Aminiya ta ji ta bakin shugabanta na Jihar Yobe Hajiya Maryam Umar, inda ta ce ta shiga wannan gidauniyar ne saboda yadda taga suna aikata aikin lada kuma ta hanyar karo- karo.
Ita Bilkisu Hassan da ake kira kueen Yemal, daga Jihar Adamawa ta ce Ita ma labarin gidauniyar ta samu a wajen kawarta wacce ta kafa ta ta hanyar WhatsApp Fadila Tilo, hakan yasa ta shigo ake tafiya da Ita.
Wannan gidauniyar ta ultimate ta kashe fiye da Naira 200,000 na irin tallafin da ta bayar kuma ta tara ne ta hanyar karo-karo daga mambobin ta.