Gobara ta tashi a dakin kwanan dalibai mata a Jami’ar Maiduguri
Gobarar ta tashi ne daga rishon girkin da daliban ke yi a dakin kwanansu.
Gobarar da aka yi a dakin kwanan dalibai mata a Jami’ar Maiduguri. (Hoto: Misbahu Bashir).
Gobara ta tashi da dakin kwanan dalibai mata a Jami’ar Miduguri da ke Jihar Borno.
Hukumar gudanarwar Jami’ar Maiduguri ta tabbatar da aukuwar lamarin, tana mai bayyana cewa wutar ta tashi ne daga girkin da daliban suke yi a dakin kwanansu.
- Sojoji sun kashe sabon shugaban ISWAP, Malam Bako
- Kar sojoji su kuskura a hana zaben gwamnan Anambra —Buhari
Sanarwar da Jami’in Hulda da Jama’a na Jami’ar Maiduguri, Farfesa Danjuma Gambo, ya fitar ta ce gobarar ta ci daki daya a daya daga cikin gine-ginen dakunan kwanan daliban, amma ba a samu rauni ba, ballantana asarar rai.
Farfesa Gambo ya bayyana cewa binciken farko-farko da aka gudanar ya nuna gobarar ta tashi ne daga rishon girkin daliban, amma za a gudanar da cikakken bincike.
Majiyarmu ta ce gobarar ta kama ne da misalin Azahar a daya daga dakunan kwanan daliban a ranar Alhamis kafin daga bisani jami’an kashe gobara su yi nasarar kashe ta.