Gwamnan Zamfara Dauda Dare ya koma APC

Kotun Ɗaukaka Ƙara ta ce babban taron da PDP ta gudanar a Ibadan a bara bai halasta ba.

Rahotanni sun bayyana cewa Gwamnan Zamfara, Dauda Lawal Dare tare da mataimakinsa sun sauya sheƙa daga jam’iyyar PDP zuwa APC mai mulki a ƙasar.

Mataimaki kuma muƙaddashin Gwamnan, Mani Mummuni ne ya sanar da hakan a madadin gwamnan wanda yanzu haka yake Umrah a Saudiyya.

• Ina da yaƙinin sabon jagoran Iran zai ɗora daga inda mahaifinsa ya tsaya — Putin
• HOTUNA: Yadda Iraniyawa ke murnar naɗin sabon jagora Mojtaba Khamenei

Bayan kammala taron majalisar zartarwar jihar da aka gudanar a gidan gwamnati da ke Gusau, mambobin majalisar da manyan jiga-jigan PDP a jihar sun amince da komawa APC, inda aka riƙa ɗaga tutoci da rera taken jam’iyyar APC a matsayin nuna goyon baya ga sabon matakin.

bayan taron majalisar zartarwar jihar da aka gudanar a gidan gwamnati da ke Gusau.

Ana iya tuna cewa, Gwamna Dare ya bayyana cewa hukuncin da kotun ɗaukaka ƙara za ta yanke kan halascin babban taron PDP da aka gudanar a Ibadan a bara zai taimaka wajen tantance matakin da za su ɗauka dangane da rikicin shugabanci da ke addabar jam’iyyar.

A halin yanzu kuma, muƙaddashin gwamnan yana ganawar sirri da ‘yan majalisar dokokin jihar domin tattauna sabon matsayar siyasar da kuma yadda za su hada kai a karkashin APC.

A wannan Litinin ɗin ce Kotun Ɗaukaka Ƙara ta tabbatar da hukuncin cewa babban taron jam’iyyar PDP da aka gudanar a birnin Ibadan na Jihar Oyo a bara, wanda ya ayyana Tanimu Turaki a matsayin shugaban jam’iyyar bai halasta ba.