Gwamnatin Tarayya ta ba da hutun Babbar Sallah
An buƙaci musulmi da su yi amfani da wannan damar wajen yi wa ƙasar nan addu’o’in zaman lafiya.
Gwamnatin Tarayya ta ayyana Litinin da Talatar makon gobe a matsayin ranakun hutu domin shagalin bikin Babbar Sallah ta bana.
Hakan na kunshe ne cikin wata sanarwa da babbar sakatariya a ma’aikatar harkokin cikin gida, Dokta Aishetu Ndayako ta fitar a wannan Juma’ar.
- Za mu bai wa Ukraine rancen dala biliyan 50 a kadarorin Rasha — G7
- Yadda alhazai miliyan 1.8 ke gudanar da aikin Hajjin bana
Dokta Ndayako ta ambato Ministan Harkokin Ciki Gida, Dakta Olubunmi Tunji-Ojo yana taya daukacin al’ummar musulmi na gida da na ketare murnar wannan rana ta idin layya.
Ministan ya kuma yi kira ga al’ummar musulmi da su ci gaba da riko da kyawawan halaye na zaman lafiya, kyautatawa da sadaukarwa kamar yadda Manzon Tsira, Annabi Muhammad (SAW) ya yi wasici da su.
Tunji-Ojo ya buƙaci musulmi da su yi amfani da wannan damar wajen yi wa ƙasar nan addu’o’i na zaman lafiya da haɗin kai.
Kazalika, ya bayar da tabbacin cewa gwamnatin Shugaba Bola Ahmed Tinubu ba za ta yi kasa a gwiwa ba wajen kare rayuka da dukiyoyin ’yan Nijeriya.