Hisbah ta kama masoya kan yin aure ba tare da amincewar iyayensu ba
Hukumar ta ce ba za ta yarda irin waɗannan al’amura su ci gaba da faruwa a jihar ba.
Hukumar Hisbah ta Jihar Kano, ta kama wani saurayi da budurwarsa bisa zargin yin aure a wajen wani taro ba tare da amincewar iyayensu ba.
A cewar Mataimakin Babban Kwamandan Hisbah, Sheikh Mujahid Aminudeen Abubakar, matasan sun yi auren ne a wajen shaƙatawa bayan wani da ba su da alaƙa da shi ya biya sadakin amaryar.
Ya bayyana cewa yin hakan ya saɓa wa ƙa’idar Musulunci kuma ba za a yarda da irin wannan lamarin ya ci gaba da faruwa a Kano ba.
“Muna sanar da cewa mun kama ma’auratan, kuma za mu ci gaba da bincike don kama abokansu da duk wanda ya taimaka wajen wannan auren na sirri domin hana irin wannan faruwa a gaba,” in ji shi.
Ya kuma yi kira ga jama’a da su kasance masu sanya ido kan irin waɗannan al’amura, tare da yaba wa waɗanda suka kai rahoton lamarin ga hukumar.
Ya ce tuni hukumar ta fara bincike kan lamarin domin sanin matakin da za ta ɗauka a kan ma’auratan.