HOTUNA: Gini ya kashe mai ‘dibar ganima’ a Kano
Har yanzu akwai mutum biyu da ake zargin suna cikin ginin
Masu dibar ganima
Gini ya danne mutane da dama da ake zargin masu dibar ganimar rodina da saura kayan gini ne a tsohon otal din Daula da ke Kano.
Ginin dai na daya daga cikin wadanda Gwamnatin Jihar Kano ta rusa bisa dalilin cewa tana kokarin kwato filayen gwamnati da aka cefanar ba bisa ka’ida ba.
- An kama Hakimi kan zargin yi wa yarinya mai shekara 5 fyade a Gombe
- ’Yan sanda sun kama ‘yan ci-ranin Nijar da Mali 12 a Kano
Rahotanni sun tabbatar da cewa mutum daya ya rasa ransa, wasu uku kuma an ceto su da rai, wasu kuma har yanzu ana ci gaba da aikin ceto su.
Shaidun gani da ido sun ce lamarin ya faru ne wajen misalin karfe 2:30 na rana, lokacin da mutanen ke kokarin dibar rodi daga cikin ginin.
Kakakin Hukumar Kashe Gobara ta Jihar Kano, Saminu Yusuf, wanda ya yi magana da wakilinmu a wajen, ya ce yanzu haka jami’ansu sun sami nasarar ceto mutum uku da ransu.
Har zuwa lokacin hada wannan rahoton, ana zargin akwai karin wasu mutum biyu ko fiya da haka a cikin ginin.
Ga wasu daga cikin hotunan aikin ceton:
