Hukumar FBI ta wanke Hillary Clinton

Hukumar Binciken Manyan Laifuka a Amurka (FBI) ta ce ba  wani laifin da za a iya tuhumar wadda ake kyautata zaton za ta zama ’yar takarar jam’iyyar Democrat, Hillary Clinton.Misis Clinton ta yi amfani da adireshin  kashin kanta lokacin tana Sakatariyar  Harkokin  Wajen kasar Amurka. Matakin dai  ya share mata  duk wani  shinge  da ka […]

Hukumar Binciken Manyan Laifuka a Amurka (FBI) ta ce ba  wani laifin da za a iya tuhumar wadda ake kyautata zaton za ta zama ’yar takarar jam’iyyar Democrat, Hillary Clinton.
Misis Clinton ta yi amfani da adireshin  kashin kanta lokacin tana Sakatariyar  Harkokin  Wajen kasar Amurka.

Matakin dai  ya share mata  duk wani  shinge  da ka iya  zame mata alkakai domin samun damar tsayar  da ita a matsayinn ’yar takarar  shugaban kasa  a karkashin jam’iyyar Democrat.
Babban Daraktan FBI James Comey  a ranar Talata  ya ce Misis Cliton da abokan aikinta  sun nuna halin ko in kula  wajen tantance  sakonnin da suka yi kewaya tsakamnin su ta kundin tattara  bayanai  na yanar  gizo mallakarta.
Har ila yau, Comey ya ce binciken hukumar da aka kwashe tsawon mako  guda suna gudanarwa sun kasa  samun  wata hujja  mai karfi daga dubban sakonnin da ta aike da su,  wanda ya nuna  cewa  ta karya  dokar kasa,  don haka  ba wani mai binciken da zai ce  ga abin da zai gabatar  domin bayyana laifinta a kan amfani  da  wannan kundin tattara bayanai mallakarta.
Hukumar FBI ta gudanar  da gagarumin  bincike  game da amfani  da tayi  da kundin tattara bayanai  mallakar kanta  madadin na gwamnati, inda  suka kwashe sa’o’i uku da rabi  suna  mata  tambayoyi a babban ofishin hukumar  da ke birnin Washington DC.
Wadannan kalaman na Mista Comey  sun zo  ne mako daya  bayan gutsiri tsoman da  ake tayi lokacin da mijin Hillary Clinton wato tsohon Shugaba Bill Clinton  ya gana da babban mai shari’a na kasa Loretta Lynch, wanda  suka yi a tashar  jirgin sama na Phonid da ke Jihar Arizona, sun kwashe minti 30 suna tattaunawa, amma kuma  ba su tabo batun ba.
Sai dai abin da ya haifar  da surutan game da wannan ganawar  shi ne  Loretta   ita ce  ta shugabanci binciken farko  game  da  zargin da ake yi wa Hilary game da amfani da wannan kundin tattara bayanai.
’Yan jam’iyyar Republican da ’yan jam’iyyarsu ta Democrat musammam masu goyon bayan Bernie Sanders su ma sun soki  wannan ganawar ta Bill Clinton da Loretta Lych.
Sai dai abokin hamayyarta na jam’iyyar Republican Donald Trump a wajen gangamin yakin neman zabensa a Jihar North Carolina, ya ce wadannan kalaman shugaban hukumar FBI abin kunya ne.
Trump ya ce “dama nasan cewa za ta tsallake wannan siradin.”
A mako mai zuwa ne dai za a yi  babban taron jam’iyyar Republican wanda  zai tabbatar  ko Trump  shi ne zai tsaya wa jam’iyyarsu takara a zaben shugaban kasa ko kuma a’a, a mako na gaba kuma  a gudanar da na jam’iyyar Democrat.