Hukumar NDLEA ta kame mai safarar miyagun kwayoyi

Hukumar Yaki da safarar miyagun kwayoyi ta kasa (NDLEA) ta  cafke  wani  mai suna Ogochukwu Ogojie, mai  sana’ar fiton  kayayyaki  daga  Najeriya  zuwa  kasar waje yana kokarin fitar da sinadarin metapitamin, wanda ya fi  hodar  koken illa da kuma tsada a dukkan kasashen duniya.Ogochukwu ya  zuba  ruwan sinadarin ne  cikin gallon din man gyada guda […]

Hukumar Yaki da safarar miyagun kwayoyi ta kasa (NDLEA) ta  cafke  wani  mai suna Ogochukwu Ogojie, mai  sana’ar fiton  kayayyaki  daga  Najeriya  zuwa  kasar waje yana kokarin fitar da sinadarin metapitamin, wanda ya fi  hodar  koken illa da kuma tsada a dukkan kasashen duniya.
Ogochukwu ya  zuba  ruwan sinadarin ne  cikin gallon din man gyada guda biyu, wanda  yake yunkurin ganin an kai masa  kasar  Afirka ta Kudu, kuma ya kai  wajen awon kayayyaki ne da  sunan man gyada tare da sauran jarkokin man gyada.
Da yake wa taron manema  labarai  jawabi,  shugaban hukumar na  tashar jirgin saman Murtala Mohammed,  Malam Hamza Umar  ya ce nauyin ruwan sinadarin ya kai sama da kilogiran 7 da aka kiyasta ya kai na miliyoyin Naira, kuma wanda ake tuhumar ya  tabbatar  da  nasa ne.
Malam Hamza ya ce  Mista Ogochukwu ya tabbatar da cewa ya kwashe shekaru kusan 10  yana fiton kayayyaki  a tashar jirgin saman, kuma  shi ne  ya sayi hajar domin ya dade yana aikin fiton kayayyaki, amma  da kyar  yake  iya  ciyar da kansa  da kuma iyalansa.
Mista Ogochukwu, mai kimanin shekaru sama da  40,  ya ce yana da mata da ’ya’ya 4, kuma ya amsa laifinsa, yana mai fadin rashin wadatar zuci da hadama ce ta tura shi ga wannan danyen aikin, alhalin yana sane da hukuncin da ka iya  hawa kansa. Ya yi nadama domin idan an yanke  masa  hukuncin zaman gidan yari  bai san wanda  zai  dauki  dawainiyar  iyalinsa ba.
Malam Hamza Umar ya ce  da  zarar sun kammala bincikensu, za su gurfanar da shi a kotu.