Hukumar tace fina-finai ta dakatar da Samha kan shigar banza

Hukumar ta soke lasisin jarumar tare da hana ta fitowa a cikin fim na tsawon watanni 12.

Hukumar Tace Fina-finai ta Jihar Kano, ta dakatar da jarumar Kannywood, Samha M. Inuwa, kan karya dokokin hukumar da suka shafi shigar banza da wallafa abubuwan da ba su dace ba.

A wata sanarwa da jami’in hulɗa da jama’a na hukumar, Abdullahi Sani Sulaiman, ya fitar, ya ce hukumar ta gargaɗi Samha a lokuta da dama kan “shigar banza da bayyana tsiraici,” amma ta ƙi bin doka.

• Sakataren Gwamnatin Ondo ya rasu bayan yin hatsarin mota
• Shugabannin Arewa na haifar da rabuwar kai wajen zaɓen ’yan takara – Kwankwaso

Saboda haka, hukumar ta yanke hukuncin dakatar da ita.

Dakatarwar, wadda ta fara aiki nan take, ta haramta wa Samha fitowa a kowane fim na tsawon watanni 12 masu zuwa.

Haka kuma, hukumar ta soke lasisin jarumar, tare da daina tantance fina-finan da ta fito a ciki.

Hukumar ta ce ta ɗauki wannan matakin ne sakamakon ƙorafe-ƙorafen da al’ummar Kano suka yi a kan halayen jarumar da suka saɓa wa dokokin hukumar.

Wannan mataki yana ɗaya daga cikin yunƙurin jagorancin hukumar, ƙarƙashin Abba Al-Mustapha, na dawo da tsari da ƙwarewa a masana’antar fina-finan Hausa.