Ina Firmino zai koma bayan raba gari da Liverpool?
Firmino ya rika fuskantar matsalar zaman benci karkashin jagorancin Jurgen Klopp.
Roberto Firmino
A karshen wannan kaka ne dai Roberto Firmino zai raba gari da Liverpool sakamakon karewar da kwantiraginsa zai yi a watan Yuni kuma ba tare da sabuntawa ba, daga kungiyar wadda ke ganin mugun koma baya a wannan kaka.
Dan wasan gaba na Brazil ya zura kwallo a wasansa na karshe da ya doka wa kungiyar ranar Lahadi wanda ta yi canjaras kwallaye 4 da 4 tsakaninta da Southampton wadda ta kammala gasar a matsayin ta karshe a teburi.
- Ana bin Filato bashin N200bn —Gwamna Mutfwang
- Zan yi aiki tare da kai, Biden ya bai wa Tinubu tabbaci
Akwai dai jita-jitar da ke alakanta Firmino da komawa Barcelona kamar yadda Daily Mail da Marca a Spain suka bayyana cewa tuni kungiyar ta Catalonia ta sanya dan wasan na Brazil a sahun cefanen da ke son yi karshen kaka.
Firmino wanda ya shafe shekaru 8 a Liverpool tun gabanin karewar kwantiraginsa, ya rika fuskantar matsalar zaman benci karkashin jagorancin Jurgen Klopp, inda ma har wasu jita-jita a baya suka bayyana yiwuwar sayar da shi gabanin karewar kwantiragin nasa.
A bangare guda, ita ma kungiyar ta Barcelona duk da nasararta ta lashe kofin gasar La Liga har yanzu ta na bukatar samar da wasu gyare-gyare don cike gibin da ta ke da shi wanda ya hadddasa mata mummunar ficewa daga gasar zakarun Turai a kakar da muka yi bankwana da ita.