Ingila ta yi waje da Najeriya a Gasar Kofin Duniya ta Mata

Ingila ta karasa wannan wasa da ‘yan wasa 10 har zuwa matakin karin lokaci.

Tawagar kwallon kafar mata ta Ingila ta yi waje da ta Najeriya a matakin sili daya kwale na Gasar Kofin Duniya ta 2023 da ke gudana a New Zealand da Australia.

Tawagar Three Lionesses ta fatattako Super Falcons ne bayan da ta doke ta ci 4-2 a bugun daga kai sai mai tsaron raga a yau Litinin.

• Matan Kano da aka taba canza sunayensu a jerin ministoci
• An sace Sarki da matarsa a cikin fada a Nasarawa

Wannan ya biyo bayan canjaras ne wanda babu ci da bangarori biyun suka yi a wannan safiya ta Litinin, a wasan da ya bai wa masoya kwallon kafa nishadi.

Ingila ta karasa wannan wasa da ‘yan wasa 10 har zuwa matakin karin lokaci, bayan da a minti na 87 alkaliyar wasa ta sallami Lauren James, shahararriyar ‘yar wasansu, wadda ta ci kwallaye 3 a matakin rukuni.

Cikin fushi Lauren ta taka bayan Michelle Alozie wadda ta fadi kasa a minti na 87, bayan kwallo ta kubuce daga kafarta.

Ingila za ta yi karon batta da Jamaica ko kuma Colombia a wasan daf da na kusa da karshe a birnin Sydney, ranar Lahadi.