Jam’iyyar APC a Jihar Nasarawa ta jinjina wa Buhari

Jam’iyyar APC reshen Jihar Nasarawa ta yaba da kamun ludayin gwamnatin Shugaban Buhari

Jam’iyyar APC reshen Jihar Nasarawa, ta jinjina wa salon shugabancin Shugaba Muhammadu Buhari a wani taron masu ruwa da tsaki da ta gudanar a Lafiya, babban birnin jihar.

Daya daga cikin shugabannin jam’iyyar a jihar, Mista Mamman Alakayi ya ce, “Wannan taro ne da mazabar Nasarawa ta Kudu ta shirya tana jinjina wa salon shugabancin Shugaba Muhammadu Buhari.

• APC na shirin gyaran tsarin mulki
• Karin farashi: APC ta roki ’yan Najeriya su kara hakuri

“Ya samar da sababbin ayyuka a sassan Jihar Nasarawa da suka hada da Kwalejin Horas da ’Yan Sandan Kwantar da Tarzoma a Nasarawa Eggon da Rundunar Sojoji na Musammam a Doma da ta Sojan Sama a Lafiya don inganta harkar tsaro a jihar,” inji shi.

Mammam Alakayi ya ce, taron shi ne na farko a yankin a cikin shekara biyar da suka wuce.

Taron ya kuma yaba da salon shugabancin Gwamna Abdullahi Sule da kuma Sanata Umaru Tanko Al-Makura kan yadda suka ciyar da jihar gaba.

Mahalarta taron sun hada da Mataimakin Gwamnan Jihar, Emmanuel Akabe da Sanata Umaru Al-Makura da Sakataren Gwamnatin Jihar, Aliyu Ubandoma da sauran ’ya’yan jam’iyyar.