Jarin bankuna ya karu zuwa Naira tiriliyan 66 —CBN
Duk da kalubalen da ake fuskanta a fannin tattalin arziki, bangaren harkokin banki yana tagazawa.
Bankin CBN
Jarin bankunan Najeriya ya karu daga Naira tiriliyan 10 zuwa Naira tiriliyan 66 a cewa Babban Bankin Kasa.
Babban Bankin Najeriya (CBN) ya bayyana cewa bangaren banki yana ci gaba da bunkasa duk matsalar tattalin arziki da ake ciki.
- Qatar 2022: Fitattun ’yan wasa 10 da suka koma ’yan kallo
- Ecuador ta lallasa Qatar a wasan farko na Gasar Kofin Duniya
Wani wakili a Kwamitin TsareTsaren Kudi na Bankin CBN, Mista Kingsley Obiora ya bayyana haka, inda ya ce, “Duk da kalubalen da ake fuskanta a fannin tattalin arziki, bangaren harkokin banki yana tagazawa tare da bunkasa cikin nasara.
Jimillar dukiyar bangaren bankuna ta cira sama daga Naira tiriliyan 10.72 a watan Agustan 2021 zuwa Naira tiriliyan 66.76 a Agustan 2022, kamar yadda bayanan Bankin CBN da zuba jari da fadada bayar da rance a muhimman bangarori suka nuna.
“Sakamakon haka, an samu karuwar harkokin tattalin arziki daga Naira tiriliyan 22.62 a Agustan 2021 zuwa Naira tiriliyan 28.12 a wannan lokaci.
“Hakan ya nuna an samu karin kashi 24.3 cikin 100 a muhimman bangarorin tattalin arziki ciki har da man fetur da gas da masana’antu da harkokin gwamnati da na kasuwanci,” in ji shi.