Jirage marasa matukan Rasha sun yi wa Ukraine ruwan bama-bamai

Rasha ta kaddamar da harin jirage marasa matuka a Kyiv, babban birnin kasar Ukraine a safiyar Litinin.

Rasha ta kaddamar da harin jirage marasa matuka a Kyiv, babban birnin kasar Ukraine a safiyar Litinin.

Tun da misalin karfe 6.30 agogon Ukraine, jirage marasa matuka suka fara yi wa birnin Kyiv luguden bama-bamai, lamarin da ya sa gine-gine da dama kamawa da wuta da kuma hayaki a sassa daban-daban.

• An gano bututun satar mai a kusa da sansanin soji
• Fursunoni 8 ne sun mutu, 57 sun jikkata a gobarar gidan yarin Iran

Fadar Shugaban Kasar Ukraine ta, “Jirage marasa matuka samfurin Kamikaze daga Rasha sun yi kwamba suna luguden wuta a babban birnin kasarmu, wanda suke ganin hakan zai taimaka musu.”

Shugaban Ma’aikatan Fadar Shugaban Kasar Ukraine, Andriy Yermak, ya ce, hare-haren sun nuna Rasha ta karaya a yakin da suka shafe wata takwas suna gwabzawa.

Amma ya ce, “Muna bukatar karin makaman kare sararin samaniyar kasarmu da na kakkabo jirage, da wadanda za mu yaki abokan gabarmu.”

Magajin garin Kyiv, Vitali Klitschko, ya ce harin jiragen ya lalata gine-gine a yankin Shevchenkivsky, yana mai kira ga mazauna da su shige mafakar da aka tanadar musu.

“Ma’aikatan kashe gobara suna kokarin kashe wuta a gidaje, wadanda da dama sun lalace, a yayin da jami’an lafiya da gudanar da aikin ceto a yankin.

“Muna kokarin gano mutanen da abin ya ritsa da su,” in ji shi ta shafinsa na Telegram.

Wadanann sabbin hare-hare na zuwa ne mako guda bayan Rasha ta kaddamar da wani gagarumin harin makami mai linzamai a kan birnin Kyiv da sauran sassan kasar Ukraine.