Kiraye-kirayen kiwon karsanar kambama karkara (2)

Babban bakin Ce-ce-ku-cen Bututun batutuwan Birtaniyawa da ke birnin Lantsandan ya shirya gangamin gamayyar gama-garin mutane da masu fashin bakin faskaren ma’anoni, inda aka yi ta tafka muhawara kan jinka wa ’yar karamar hukuma matsabbanta da aka mutsutsuke aka motse a asusun assa asarar hadakar jiha. Takaddamar muhawarar dai an tafka ce kan muhimmancin jinka […]

Babban bakin Ce-ce-ku-cen Bututun batutuwan Birtaniyawa da ke birnin Lantsandan ya shirya gangamin gamayyar gama-garin mutane da masu fashin bakin faskaren ma’anoni, inda aka yi ta tafka muhawara kan jinka wa ’yar karamar hukuma matsabbanta da aka mutsutsuke aka motse a asusun assa asarar hadakar jiha. Takaddamar muhawarar dai an tafka ce kan muhimmancin jinka wa kananan hukumomi mtsabbansu kai-tsaye daga lalitar Gwamnatin Tarayyar Haurobiya.

To mafi yawan mahalartar wannan gangami sun yi ammana da tsarin jinka kudin kai-tsaye ga kananan hukumomi, yayin da wadansu kuwa suka bijiro da muhimmancin yin taka-tsantsan, don kada a koma gidan jiya, inda Shugaban Cacamama da Kawuntsila suka yi ta shan dage-dage da dabge, alhali sun yi shakulatun bangaro da dimbin ayyukan kyautata rayuwar al’umma. A wuraren da mahukunta ke dan tabuka wani abin a zo a baje na-mujiya, sai a iske cewa al’ummar gari sun shantake, ko ma sun tsunduma ka’in-da-na’in cikin hada-hadar kashe gararin gabansu.

Ni kuwa Babban Direban alli a farfajiyar Dodorido da ke jan ragamar masu watsattsake da fallen shafukan mujallu da makalu da wagagen littattafai sai na fasko cewa, daidai wannan lokaci da ake ta tsokale-tsokalen tsokacin tatataburzar tafka takaddama, ai kuma ana ta KIRAYE-KIRAYEN KIWON KARSANAR KAMBAMA KARKARA, bisa la’akari da wannan batu, sai na hango cewa akwai bukatar taya kaza kyarkyara har zakara ya yi yunkurin carin carar tarairayar kafatanin karkarar kasar nan. Domin ta haka ne kawai za a iya karya lagon kassara karkara da garkuwar garara kuwwa da ake ta tsuwurwurtawa a cikin kungurmin daji, ta yadda a wasu lokutan a kan karke da malalar da jinanen al’ummar da ba su ji ba, ba su gani ba. Uwa-uba da wannan ’yar karamar hukuma da aka jinka mata ’yan matsabbanta a hannu, wajibi ne masu jan ragamar al’amura su rage dogon buri, tare da kara kwazon kiran kowa ya zo a hada karfen karafa wajen shawo kan zaman dirshan din kashe fatari a tsakanin masu fuka-fukin tashi, don a dakushe karsashin fushin da ke haifar da fashi.

Daidai lokacin da ake ta ka-ce-na-ce kan  Rubdugun ragargazar Ruga Raga-ragar raga da rakin rashin riga ga rububin ragon raga, inda ake ta Ruge-rugen rarumar rikon rogo raga-raga. Sannan ana ta  kwanaren karo-karo a sasarin sunkurun soro da tumurmutsin tumbatsar taro, inda ake ta kwane-kwanen kwararo-kwararo, har aka haifar da jimirin jinkirin Jauro a makekiyayar makiyaya ta matattara mikakkiya da za a mamayi makiyaya su daina makokin marainiya ko daukar matakin makauniya. Kawai sai dai a agaza wa Fifi-dallo tun daga Futa-toro da Futa-djallo su yi ta Fulfulden fafutikar Fullo da samar da naman bisashe kilo-kilo, har ma da agwagi da talo-talo. Idan kuwa so ake a daina cin nama, to a sani tabahuwa na sa hamma. Bisa la’akari da wannan sai a ce da  makiyaya a kara himma, ta hanyar dabarar zamani, wadda ita ce makama, domin garambar daji ta rasa kima. Tunda karkara ta samu kasura, ai sai a umarci karamar hukuma ta yi masana’antar jima da karofin rini su samu gindin zama, ta yadda kowa da kowa zai zo a yi kama-kama, don tuli-tulin tattalin tarin arziki ya kankama.

Dimbin masu ruwa-da- tsaki sun yi ta tsakule-tsakulen tsokacin tsince-tsincen tsaba da tsakuwa, musamman don ganin an warware sasarin shure-shuren artabun aturen aringizo a tare, in an yi taga-taga an tattare a dumuiniyar danne damin dukiya a daure, musamman yadda  Gwamna gwarangwam ya yi gangankon gangamin gamin gambizar gararumar gande-gande a HADAKAR HARAMBEN HANDAME HAURO, har ta kai ga ’yar karamar hukuma ta zama guzuma, su kuwa suna ta kwasar gararuma; mahukuntan jihohi na ta fama wajen danne fama-famai da dama. Wannan ne dalilin da ya haifar da tattare aika-aikan ayyukan ciyar da al’umma gaban KWAKWAREN BURTSATSE duk an tattare su a kwaryar birane, yayin da  yankunan KARKARA a ka yi musu KAKARAR KAKARE, shi ya sa ma ba mai taimakon talakawa. Shi kuwa Ci-amanar camama ba ya da ta cewa, ga Kawuntsila na nuku-nuku kamar zai yi gudawa. Uban tafiya kuwa, Gwamna gwarangwam mukarrabansa sun gama ganawa.

Kulle-kullen kitimurmurar karmamin kara, ita ma ta haifar da bin labi-labi na kunya, alhali  lawali ma ba wata hanya, wadanda alhakin abin ya rataya a wuyansu sun kwashe matsabbai suna ta dirkaniya. Wannan ne babban dalilin da ya sanya Gamin-gambizar hakkoki suka yi dankaron dankara, har ta kai ga ana ta fantamawar fatara da baranbarama karara, a cikin cukudi-cukudin cumuimuye kudin asusun asassa asara, wato wani zungurun mazurarin dibar kudi kwara-kwara don bai wa wasu damar kwasar gara.

Sanannen al’amari dai shi ne, kauyukan kayau na karkashin gudanarwar biranaen bilinbituwar bankaurar Barau, dibge da kayan alatu da kayan karau, masu hannu da shuni na ta tauna gyada marau-marau, tunda ai talakawan talalar talauci talau ba sa gani garau-garau. Abin da ya haifar musu da irin wannan yanayi kuwa, shi ne kwashe-kwashen Kwasau, don kawai an ga sun yi jimamin Jimrau sun baje madubin Dubarudu, suna kallon ruduwar yanayin birgimar Barau da karajin kasurar Kosau, sai dai masu hankali a kwakwalwarsu na tone-tonen tunanin Tunau a make-maken Makau da murtukewar Mantau a kauyukan fankan fayau.

Ganin irin wannan dirkaniyar da ake ta dirkawa, sai muka nusar da cewa a birin Dikko an yi Kumayau, yayin da  aka yi yunkurin ankarar da Gwamna Mai-samari na birnin Korau. Kuma ba mu yasar da  Gwamna el-Rusau, Ja-gaban jan talaka talau ciki da baka lafiya lau har gari ya yi sumul kalau, ko an fara gani ko ba tabarau.

A dai bi tanade-tanaden kundin kunshe tushe, don ka da a kwance mana tushe, tunda gari ya washe, lallai a daina wawushe-wawushe. A kyautata karkara, ta yadda majiya karfi karfafan da ya kamata a ce suna fardar garka da gayauna za su daina tutudowa birane suna birgimar bankaura da luluben laftun langa-langar lallaga wahalhalu wujijjiga jama’a.  Kuma FAFUTIKAR FIFI-DALLON FULLON FUTA-TORO DA FUTA-DJALLON babbar masana’anta ce da karamar hukuma ya kamata ta dauka da muhimmanci, don hana al’umma shantakewar zaman dirshan din kashe fatari.