Za a kai Hadi Sirika gidan yari idan… —Kotu

Kotu ta ba umarnin tsare su Hadi Sirika a gidan yari idan ba su cika sharudan beli ba

Babbar Kotun Tarayya ta ba da belin tsohon Ministan Sufurin Jiragen Sama Hadi Sirika da ’yarsa Fatimah da wasu biyu a kan Naira miliyan 100 kowannensu. 

Alkalin kotun da ke da ke zamanta a Abuja, Mai Shari’a Sylvanus Oriji, ya ba da umarnin tsare su Hadi Sirika a gidan yari idan ba su cika sharudan belin ba.

Mai Oriji ya shardanta wa kowanne daga cikinsu kawo mutanen kirki biyu da za su tsaya masa, kuma dole kowanne daga cikin mutanen ya kasance ya mallaki gida a Abuja.

Kotun ta kuma haramta wa su Hadi fita kasar waje ba da izinin kotu ba, sannan ta dage sauraron shari’ar zuwa ranakun 10, 11 da kuma 20 ga watan Yuni, 2024.

• Matsafa sun yanke mazakutar dan shekara 2 a Neja
• Majalisa Ta Yi Watsi Da Kudurin Hana Bankuna Cirar 0.5%

Mai Shari’a Shari’a Sylvanus Oriji ya sanar da haka ne bayan an gurfanar da su a safiyar Alhamis kan zargin karkatar da Naira biliyan 4.1 daga asusun gwamnati.

Hukumar Yaki da Masu Karya Arzikin Kasa (EFCC) ce ta gurfanar da Hadi Sirika tare da ’yarsa Fatimah da Jalal Hamma da kuma Kamfanin Al-Duraq Investment Ltd.

Binciken da EFCC ta gudanar ne ya bankado badakalar kwangilar Naira biliyan 4.1 a ma’aikatar sufurin jiragen sama a lokacin jagorancin Hadi.