Kotu ta daure jarumin Kudancin Najeriya shekara 16

Kotun ta same shi da laifin cin zarafin yarinya

Wata kotu a jihar Legas ta daure fitaccen jarumi a masana’antar Nollywood ta Kudancin Najeriya, Olanrewaju Omiyinka James, wanda aka fi sani da Baba Ijesha shekara 16 a gidan yari.

Alkalin kotun, Mai Shari’a Oluwatoyin Taiwo ta samu jarumin ne da laifin cin zarafin karamar yarinya mai shekara 16 a tsakanin shekarun 2013-2014.

An kai karar jarumin ne bisa tuhume-tuhume guda shida, inda Alkalin ta tabbatar da guda hudu, ta wanke shi a sauran.

Wannan hukuncin na zuwa kwanaki kadan bayan wata kotu a Amurka ta daure mawakin Amurka, R. Kelly shi ma saboda cin zarafin.