Kwamishinan ’yan sanda ya umurci kamo dillalan miyagun kwayoyi a Kaduna

Kashi 70 cikin 100 na masu aikata miyagun laifuka a Arewa suna ta’ammali da miyagun kwayoyi.

Kwamishinan ’yan sandan Jihar Kaduna, Mudassir Abdullahi ya umurci daukacin shugabannin ofis-ofis din ’yan sanda da su kamo akalla dillalin kwayoyi daya nan da kwanaki bakwai.

Ya bayar da umurnin ne a lokacin da yake jawabi ga shugabannin kungiyoyi da jami’an ’yan sanda a Babban Ofishin ’yan sanda shiyyar Zariya a yayin ci gaba da rangadin da yake yi don sanin halin da jami’ansa suke ciki.

• Anambra: Yayin da ake shirin bude rumfunan zabe
• Xavi ya zama kocin Barcelona

Kwamishinan ya ce kashi 70 cikin dari na masu aikata fyade da sauran miyagun laifuka musamman a Arewa masu ta’ammali da miyagun kwayoyi ne, lamarin da ya ce dole a tashi tsaye domin daukar matakan da suka dace.

Ya ce duk wanda aka kama da aikata fyade ba za su saurara ba wajen daukan matakin da ya dace.

A game da wata mata da ake zarginta da bata kananan yara ’yan shekara 6 da haihuwa ta hanyar kwakule, kwamishinan ’yan Sandan ya ce da zarar sun kammala bincike za su gabatar da ita gaban Kotu.