Kwangen kunduge kadagon kwadago
Malam Na-Agege Kana ta hange-hange Kan kugin kwadagon shige-shige Kiwon bujimi da nagge Mun ga kana ta kange-kange Siyasa ka kada wa kuge Karin ladar kwadago a dage A daina karon bera da mage Kai ta maza kamar dage A yasar da rage-rage ’Yan kwadago sun yi lage Bakuna duk a wage Ana […]
Kwangen kunduge kadagon kwadago
Malam Na-Agege
Kana ta hange-hange
Kan kugin kwadagon shige-shige
Kiwon bujimi da nagge
Mun ga kana ta kange-kange
Siyasa ka kada wa kuge
Karin ladar kwadago a dage
A daina karon bera da mage
Kai ta maza kamar dage
A yasar da rage-rage
’Yan kwadago sun yi lage
Bakuna duk a wage
Ana tsimayar goge
Wasu sun fara coge
Za su jefa al’umma a sange
A dai shirya miyar dage-dage
Da tsuntsun miya na dabge
Kar ai mana kwange
Makaryata sun saba da kage
Cin mutuncin har da zage-zage
Damuwar kurda-kurdar tsiya
Dabgen damo-da-kura-da-diyya
Dundumin dama-damar duniya
Daura damarar dirkaniyya
Dokar dawainiyar danne dukiya
A dai yi mai yiwuwa
Don inganta rayuwa
’Yan kasa su zam morewa
Al’umma ta daina kwaruwa
Tsiraru su daina dira wawa
Na-Agege tuni na hango
Mui ta duba agogo
Lada da la’adar kwadago
Wuya ake so a zargo
Kiren karairayi ake so a kago
Za su hana shiga shago
Su hana ai wa kowa ungo
Sui ta kumbiya-kumbiya a kango
A daki su lullube da bargo
Talaka hunturu yai masa illa a bargo
Zabalbalar garin talge
Tukin tuwo muciya ta doge
Awon hatsi ba kwange
Gayauna mai yabanya ta burge
Ciyayin shuka duka an tsige
Karmamin kaya da tsittsige
Tsinin tsirrai tsiga an tsarge
Karonbattar kariya an yage
Zogala gandi an zuge
Zaburar zabari ta zabge
Turka-turkar tankiya
Tattakin takun tunkiya
Takarkarewar takurar turjiya
Turereniyar taraliya
Taba-ka-lashen tauniya
Karairayin masu mukamai
Ke haddasa daukar makamai
Sui ta waskiyar lashe amai
Ba manufa takamaimai
An fafata yaki ba jarmai
Ana ta musayar kalamai
An rasa komai da komai
Mai na-duke ya daura dammai
Falke ya daure fama-famai
Magabta sun lashi maskin mai
A dai yi kintace
A kyautata hasashe
A daina kushe-kushe
Mu kiyayi waskace-waskace
Da Kyakkyawar niyya a ke dace
A dai yi waiwaye
Komai a yi kai waye
A takatsantsan da tawaye
Batun ingarma a kiyaye
Sai magabta su sha kaye
’Yan adawa ne da yarfe
Za su sa kasarmu rarrafe
Kowa ya tako a tafe
Mui karfa-karfan karfe
Mui ta sammako da sassafe
A farfajiyar makarantar Dodorido da ke cikin Amintacciyar jaridar kasar Haurobiya, a lokuta mabambanta mun sha nusar da hukumomin kasar nan muhimancin karin LADA DA LA’ADAR KADAGON KWADAGON DIREBOBIN ALLI,musamman don su suka fi kowane dan kasar nan aiki mai muhimmanci, wato KOYAR DA WATSATTSAKE DA BUDA WAGAGEN LITATTAFAI. Maratabar direbobin alli dai karara take, domin kowane mukami mutum ya taka a zamanin nan kusan a iya cewa sun bayar da gagarumar gudunmuwa. Sai dai manhajar makarantarmu mara hajijiya, ba za ta gajiya ba, wajen ganin an warware takun sakar da ake tafkawa tsakanin MALAM NA-AGEGE DA KUNGIYAR KWADAGO MASU KWAFAR KADAGON KOTO.
Lallai Gwamnatin Babanburin-huriyya ta yi hanzari wajen fasko cewa, ‘tsallen badaken fafutikar fantamawar masu laluben kadago ba sabon al’amari ba ne a kasar nan.’ Don tun daga shekarar alif sili da manuniyar kasa da ta kasa da ta kasa, zamanin da aka dawo da mulkin DAMO-DA-KURA-DIYYA ka’in a na’in, har yanzu ake ta yi ba kakkautawa, tunda kungiyar karajin karfafa kadago ta kunduge turka-turkar takun sakarta ba gudu, ba ja da baya, inda ta sa zare da gwamnati don ganin an cika mata lalita cif-cif.
Su kuwa wakilan gwamnati irin su Malam Na-Agege sai jan kafa suke ta yi, tare da musayar kalamai, har ta kai ga an kusan rasa komai da komai, wajen cimma matsaya ko ma a ce sun yi amai, sun lashe, tare da bai wa magabtan al’umma damar lasar maskin mai. Su kuwa wakilan ’yan masu laluben kadago sai sukuwar godiyar artabu suke yi, amma yakinsu ba jarmai. Watakila irin wannan tseren dodon kodi da hanzarin hawainiya ya sanya aka kasa kaiwa ga gaci. Duk yunkurin da ake ta yi ya za me wa al’ummar kasar nan tamkar sammakon bokokuwa (bubukuwa).
’Yan makarantar Dodorido, wajibinmu ne mu nusar da Haurobiyawa abin da ya dace, wato dai a yi mai yiwuwa.
Ko dai so ake a karke da KWANGEN KWADAGON NA-AGEGE.
Lallai a inganta farfajiyar Bokan Turai don tarairayar rai; a bai wa direbobin alli daukacin kayan aikin da suke bukata don saisaita karatun wasikun jakin dawa da na gida a kwakwalwar Haurobiyawa, ta yadda za a samar da zakakuran masana da za su iya bunkasa dabarbarun tattalawa da alkinta dukiyar kasa. Shi ke nan mun yi hannun riga da SIYASAR YASAR HAURO, al’amarin da ke haifar wa al’umma haure-haure da hauragiya a kasar Haurobiya. Daga nan an shawo kan kwashi-kwaraf din yi wa lalitar kasa karkaf ko a kwashe komai kakaf Akwai bukatar ganin Jami’an Asusun ilimi, musamman wadanda ke takaddama da hukuma a jam’in jama’ar jami’o’in Haurobiya, sun yi kaimi, wajen inganta tsarin zamantakewar al’umma, ta yadda za mu kauce wa zaman-tattakewa, ko kashin sha-kushe.
’Yan kwadago a yi takatsantsan da tawaye, domin tuni gari ya waye, mu rinka dubi da waiwaye, don gudun kada mu karke da zubar da hawaye; ko a zo ana ta batun waye, waye?! Jiki dai magayi bankar bukin dan Korau!