Labari da dumiduminsa: Buhari ya koma bakin aiki yau
Shugaban Kasa Muhammadu Buhari ya koma bakin aiki a yau Litinin da misalin karfe 11 da minti 20 na safe. Shugaban kasar bai je ofis ba amma ya zabi ya fara gudanar da aiki daga gidansa. Wani jami’i a fadar shugaban kasa ya fada wa manema labarai a fadar shugaban kasa cewa dalili shi ne […]
Shugaban Kasa Muhammadu Buhari ya koma bakin aiki a yau Litinin da misalin karfe 11 da minti 20 na safe.
Shugaban kasar bai je ofis ba amma ya zabi ya fara gudanar da aiki daga gidansa.
Wani jami’i a fadar shugaban kasa ya fada wa manema labarai a fadar shugaban kasa cewa dalili shi ne ana gyara ofishin shugaban kasar.
Jami’in ya ce wanda bai so a bayyana sunansa ba ya ce shugaban kasa zai koma ofishinsa da zarar an kammala gyaran ake yi.
Ya kara da cewa da safen nan shugaban kasa ya sanya hannu a wasikar da ya aike wa majalisa don ya sanar da su dawowarsa daga jinya daga Birtaniya.
A sanarwar da ya sanya wa hannu, Mai Magana Da Yawun Shugaban Kasa, Mista FemiAdesina ya bayyana cewa Buhari ya aike wa da majalisa wasika don sanar da su dawowarsa daga Birtaniya kamar yadda dokar kasa ta tanada.
“Shugaban Kasa ya dawo Najeriya tun ranar Asabar, 19 ga watan Agustan shekarar 2017 kuma a wasikar da ya sanya wa hannu ta ranar 21 ga watan Agusta shekarar 2017 ya sanar da Majalisar Dattawa da ta Wakilai cewa ya koma bakin aiki”. Inji shi.
Ya kara da cewa “ Wasikar ta nuna cewa bisa la’akari da sashe na 145 na kundin tsarin mulki Najeriya na shekarar 1999 da aka yi wa gyaran fuska. Ina sanar da cewa na koma bakin aiki a matsayina na shugaban kasar Najeriya daga ranar Litinin din nan, 21 ga watan Agustan shekarar 2017 bayan jinyar da na yi a kasar Birtaniya”.