Lampard zai jagoranci Coventry a kakar wasanta ta farko a Firimiya cikin shekaru 25
Lampard ya zaɓi ci gaba da zama a Coventry domin jagorantar ƙungiyar a kakar wasanta ta farko a Firimiya cikin shekaru 25.
Kocin Coventry City, Frank Lampard, ya sanya hannu kan sabuwar yarjejeniyar da za ta ci gaba da riƙe shi a ƙungiyar har zuwa ƙarshen shekarar 2029.
Lampard mai shekara 48 ya jagoranci Coventry City zuwa lashe gasar Championship a kakar wasan da ta gabata, lamarin da ya tabbatar wa ƙungiyar da koma wa Gasar Firimiya ta Ingila bayan shafe shekara 25 ba ta taka leda a babban matakin ƙwallon ƙafar ƙasar ba.
- DAGA LARABA: Yadda Almajiri Ya Rikide Ya Zama Mabaraci
- Gwamnatin Tarayya na shirin sake fasalin tsarin JSS da SSS a makarantun sakandare
Tsohon kwantiraginsa zai ƙare ne a ƙarshen kakar wasa mai zuwa, kuma rahotanni sun ce wasu ƙungiyoyi, ciki har da Fulham, sun nuna sha’awar ɗaukar sa a wannan bazarar.
Sai dai tsohon ɗan wasan tsakiya na Chelsea da tawagar Ingila ya zaɓi ci gaba da zama a Coventry domin jagorantar ƙungiyar a kakar wasanta ta farko a Premier League cikin shekaru 25.
Coventry za ta fara kakar wasan da za ta kara da Arsenal, wadda ke riƙe da kambun gasar, a ranar Juma’a, 21 ga Agusta.
Lampard ya karɓi ragamar horar da Coventry City ne a watan Nuwamban 2024 bayan maye gurbin Mark Robins, lokacin da ƙungiyar ke matsayi na 17 a teburin Championship, maki biyu kacal tsakaninta da rukunin faɗuwa.
A kakar farko da ya fara a ƙungiyar, Coventry ta yi nasara a wasanni 28, adadi mafi yawa da ta taɓa samu a kakar gasar lig, lamarin da ya ba ta damar lashe kambun Championship da kuma samun tikitin komawa Premier League.
Kafin wannan nasarar, Lampard ya jagoranci Coventry zuwa wasan neman gurbin shiga Premier League (play-off), inda ta sha kashi a hannun Sunderland da jimillar ƙwallaye 3-2 a wasan kusa da na ƙarshe.
Lampard ya fara aikin horarwa ne da Derby County, sannan ya horar da Chelsea sau biyu da kuma Everton.