Jikan Sardauna, Magajin Garin Sakkwato, ya rasu

Alhaji Hassan Danbaba ya rasu bayan rashin lafiyar kwana daya a Kaduna.

Allah Ya yi wa Magajin Garin Sakkwato kuma jikan Sardaunan Sakkwato, Alhaji Ahmadu Bello, wato  Alhaji Hassan Danbaba, rasuwa.

Alhaji Hassan Danbaba ya rasu ne a ranar 12 ga watan Farairu, 2022 bayan rashin lafiya ta kwana guda yana da shekara 54.

• Zaben Abuja: Dan siyasa ya kashe mai kada kuri’a
• An sallami hadimar Aisha Buhari daga aiki

Daya daga cikin makusantan marigayin, wato Hassan Muhammad Binanchi, shi ne ya tabbatar cewa rasuwar ta auku ne a Jihar Kaduna bayan rashin lafiya da ta sami Magajin Garin Sakkwato a ranar Juma’a a sakamakon tuntube da ya yi a kafarsa.

Makusantan mamacin sun ce za a yi janazarsa a Jihar Sakkwato, bayan da aka kawo gawarsa.

Alhaji Hassan Danbaba ya rasu ya bar matan aure uku da ’ya’ya shida, mata hudu da  namiji daya.

Marigayin sanannen mutum ne a Nijeriya kuma jika ne ga Margayi Sardaunan Sakkwato Ahmadu Bello.

A watannin baya ne mahaifiyarsa, wato ’yar Sardauna, Hajiya Hafsa ta rasu.