Mahaifiyar Babban Editan Daily Trust ta rasu

Za a yi jana’izarta da karfe 8:00 na safiyar Litinin a Kano.

Mahaifiyar babban editan jaridar Daily Trust, Naziru Mika’ilu Abubakar, wato Hajiya Rakiya Abubakar ta rasu.

Marigariyar ta rasu ne da yammacin Lahadi a gidanta dake unguwar Koki a birnin Kano.

• ’Yan bindiga sun kashe jami’an ’yan sanda 13 a Zamfara
• Turji: Dan bindiga ya sako mutum 150 a Zamfara

Da yake tabbatar da rasuwar a shafinsa na Facebook ranar Lahadi, Malam Naziru ya rubuta, “Inna Lillahi wa Inna Ilaihi Raji’un. Allah ya yi wa mahaifiyarmu rasuwa yau [Lahadi] da yamma.

“Za a yi jana’izarta a unguwar Koki, bayan masallacin Gwani Danzarga da misalin karfe takwas na safiyar ranar Litinin.

“Allah ya jikan Inna da rahama da sauran iyayenmu, ya kuma hada mu da su a Aljannar Firdausil Aalaa. Ameen.”