Mahara sun kashe dalibai 3 a makarantar ’yan Shi’a a Yobe

Ɗaliban suna tsaka da barci maharan suka fito da su suka buɗe musu wuta

Wasu mahara sun kutsa wata makarantar mabiya aƙidar Shi’a suka harbe dalibai uku har lahira a Jihar Yobe.

A daren Alhamis ne maharan da ake zargin mayaƙan ƙungiyar Boko Harma ne, suka kutsa makarantar Fadiyya da ke Karamar Geidam suka yi wannan aika-aika.

Aminiya ta gano cewa ɗaliban suna tsaka da barci a cikin fitacciyar makarantar da ke unguwar Hausari ne maharan suka far musu.

Wani ganau ya ce “sai da maharan suka fito da daliban waje kafin suka buɗe musu wuta.”

• Ba ta yi barci ba a shekara 30
• Yadda jama’ar gari suka kashe ’yan fashin daji 37 a Zamfara

Wani dan banga a garin Geidam ya bayyana cewa wani dalibi da ya tsallake rijiya da baya a harin ya samu raunuka kuma yana samun kulawa a asibiti.

Kakakin ’yan sanda a Jihar Yobe, Dungus Abdulkarim, ya tabbatar da aukuwar lamarin ga wakilinmu a safiyar Juma’a.