Malaman Kwalejin Nuhu Bamalli sun tsunduma yajin aiki
Yau Talata malaman Kwalejin Kimiyya da Ƙere-ƙere ta Nuhu Bamalli da ke Zariya a Jihar Kaduna suka fara yajin aiki har sai abin da hali ya yi.
Malaman Kwalejin Kimiyya da Ƙere-ƙere ta Nuhu Bamalli da ke Zariya a Jihar Kaduna sun tsunduma yajin aiki.
Ƙungiyar Malaman Kwalejin Kimiyya da Ƙere-kere (ASUP) reshen makarantar ta fara yajin aikin ne daga yau Talata, 39 ga Satumba, 2025.
Ƙungiyar ta fara yajin aikin ne bayan zaman da ta yi da wakilan gwamnatin jihar, inda Babban Sakataren Gwamnatin Jihar, ya buƙaci su ƙara haƙuri, yana mai cewa Gwamna Uba Sani ya nuna alamar amince biyan buƙatunsu.
Sanarwar da Kwamared Usman Shehu Suleiman ya sanya wa hannu ta ce, bayan tattaunawar da nazarin da suna yi, ƙungiyar ASUP ta yi ittifaƙin cewa, “Daga Talata, 30 ga Satumba 2025 mu fara yajin aiki har sai abin da hali ya yi.”
- An shiga taron gaggawa kan takun saƙar PENGASSAN da Matatar Dangote
- ASUU ta bayar da wa’adin tsunduma yajin aiki a faɗin Nijeriya
Ya ƙara da cewa yajin aikin zai ci gaba da gudana har zuwa lokacin da suka samu amincewar gwamnati da buƙatun malaman a hukumance.
Uwar ƙungiyar ASUP ta buƙaci tafiya yajin aikin sai abin da hali ya yi ne idan gwamnatin jihar ba ta amince da tsarin albashin Kwalejojin Kimiyya da Ƙere-ƙere (PSS) bayan albashin watan Satumba.
Sauran buƙatun sun haɗa da aiwatar da tsarin albashi na CONPCASS/CONTEDIS ga ɗauƙacin ma’aikata a manyan makarantu mallakar jihohi da kuma ƙara yawan shekarun yin ritayar waɗanda ba malamai ba zuwa shekara 65.