Manyan ’yan ta’adda sun kashe juna a Katsina

Moɗi-moɗi ne ya kashe jarumin ɗan sandan nan na garin Dutsinma wanda ya hana su yin rawar gaban hantsi a kwanakin baya.

Da misalin ƙarfe 1:00 zuwa 2:00 na ranar Laraba ne aka yi artabu a tsakanin gungun ’yan bindigar daji da suka addabi yankunan ƙananan hukumomin Safana da Danmusa da Batsari.

Usman Moɗi-moɗi da Jan Kare tare da wasu da dama daga cikinsu sun kwanta dama ta hannun wani ɗan bindigar mai suna Kabiru Mai Ɗan Hannu.

• An ɗage zaɓen ƙananan hukumomin Yobe
• Kwamishinoni 3 sun yi murabus a Ribas

Kamar yadda labarin ya iske mu daga wata majiya mai ƙarfi wadda ke da kusanci da garin da abin ya faru, ta ce, su dai su Moɗi-moɗi sun je sun sato dabbobin su Kabirun ne yayin da suka biyo sawunsu kuma aka yi masu kwanton ɓauna.

A nan aka fafata har su Kabiru suka yi nasara a kan su Moɗi-moɗi.

In za a iya tunawa, Moɗi-moɗi ne ya kashe jarumin ɗan sandan nan na garin Dutsinma wanda ya hana su yin rawar gaban hantsi a kwanakin baya.