Marcus Rashford ya yi hatsarin mota
Darajar motar da Rashford ya yi hatsarin da ita ta kai fam dubu 700.
Dan wasan gaban Ingila da Manchester United Marcus Rashford mai shekaru 25 ya yi hatsarin mota a Birtaniya.
Lamarin ya auku ne yayin da dan wasan ke kan hanyarsa ta komawa gida bayan kungiyarsa ta Manchester United ta yi nasara kan Burnley a ranar Asabar.
- Mun kashe ’yan ta’adda 52 a Borno da Yobe — DHQ
- Diphtheria: Cutar mashaƙo ta yi ajalin mutum 10 a Jigawa
Bidiyon da ake yadawa a shafukan sada zumunta ya nuna motarsa fara kirar Rolls Royce wadda darajarta ta kai fam dubu 700 a gefen titi bayan ta yi hatsarin.
Jaridun Ingila sun ruwaito cewa dan wasan bai ji rauni ba a hatsarin da ya rutsa da shi.
Rashford ya buga wasa na mintuna casa’in a filin wasa na Turf Moor inda kungiyarsa ta Manchester United ta ci Burnley 1-0, kwallon da Bruno Fernandes ya ci.
Wannan ne karo na farko da Manchester United ke cin wasa bayan kungiyar ta yi rashin nasara a wasanni uku da ta yi a jere.