Matasa a guji rikicin siyasa

Dole ne in yi wa kaina adalci, don ba  zan ci zamanina, in ci na wani ba, don haka  ba zan kira  kaina matashi  ba. Hausawa na cewa in an girma, a san an girma, don Allah a rinka tunani. Kuma ni  dai ba aiki za a daukan ba, ballantana in rage shekaruna; ba kuma […]

Dole ne in yi wa kaina adalci, don ba  zan ci zamanina, in ci na wani ba, don haka  ba zan kira  kaina matashi  ba. Hausawa na cewa in an girma, a san an girma, don Allah a rinka tunani. Kuma ni  dai ba aiki za a daukan ba, ballantana in rage shekaruna; ba kuma takara zan yi  ba. Allah suturi bukwai inji kishiyar mai mageduwa.

A tawa shawarar duk wanda ya dara shekara 35 ya fitar da kansa daga sahun matasa. A ganina in ya dara shakara 40 kuma  yana kiran kansa matashi, bai gode wa Allah ba. Don shekaru  rahama ne, idan  ka  samu ka zama mai godiya ga Rabis samawati.

Domin a cikin wadannan shekarun  komai  dakikancin mutum dole  ya ilimantu  da darasin yau da gobe, kuma dole akwai  ilimin da ya samu na rayuwar  duniya,  wanda  za a iya  amfanuwa  da shi. To  na me Allah Ya  yi mini baiwa da shekaru zan zama butulu? Dalilai marasa tushe  kan sa ’yan sama da shekara 40 kiran kansu matasa. Ni  ba  matashi  ba ne don  na dara wa shekara  40, na yi aure, ina  da shekara  23. Ina da  shekara  24, na samu  dana  na  farko.wanda ya  rasu bayan  watanni da haihuwarsa.

Ina da shekara 25 na haifi dana na biyu. kuma yana raye yana karatu,yana yawan  cika min gida da matasa. Sai in dawo cikin abokansa, in ce ni matashi ne? Ka san  rayuwarmu ba ta ’yan bariki  ba ce. Don haka  tun kafin in haifi dana na farko  marigayi da na biyu dan matashi ina rike  da yara  biyu  mata. Ina da shekara 23, dayansu na da shekara  biyu, daya watanni  tara. Wadannan  yaran  duk an aurar da su, suna auren  wadansu matasan. Shi ke nan sai in dawo cikin surukaina, in ce ni ma matashi  ne? Babu godiya a ganina, ga duk wanda ya  haura 40 ya kira kansa matashi. Domin ko a Musulunci  shekara 40 na daga cikin  shekarun cikar hankali; ko Bature  cewa ya yi  wawan  shekara 40, wawa ne  har abada.

Daga shekara 40 zuwa 55 kamata ya yi  mutum ya zama tsaka-tsakin mai bai wa matasa  shawara. Daga shekara 55 zuwa 70 dattijo daga 70 zuwa sama tsoho. Allah  Ya sa  mu zama  dattawan  kirki, mu kuma yi tsufa  mai kyau. Don  kuwa duk matashin da bai yi  rayuwar kirki ba, zai zama dattijon banza; zai kuma tsufa a wulakance, zai mutu cikin kaskanci, Allah Ya kiyaye mu.

A matsayina na mai bai wa matashi  shawara, kan yadda  zaben  nan  ya taho,  zan  shaida masa cewa,  ‘duk wani dan sama da 40 idan ya shigo cikin wadanda ya kamata  ya ba mu shawarar kirki bai ba mu ba, zan dauke shi a  mutumin banza!  In dattijo ne na banza, in kuma tsoho ne, wanda tsufa ya yi gardama, to  ya zama tsohon banza!

Ba zan yarda da wanda zai ce in je gidan wani da muke da bambancin ra’ayi in kai farmaki ba. Domin sau da yawa irin wadannan hare-hare  ana kai su ne domin  hassada kawai, sai a ce bari rikicin siyasa ya barke, gidan wane da wane sai mun kona su. Matasa su sani mafi yawa daga cikin  hankoron taba dukiyar wani hassada ce kan kawo su, kuma ba wani amfani wannan zai yi  a nuna fushin zabe ba. Wane ne zai iya  canza wannan?  Da ina cikin matasa ba zan bari a yi  amfani da ni a kone-kone domin zabe ba.

Da ina cikin Matasa ba zan bari a yi amfani da ni wajen kona kayan gwamnati  ba. Don kuwa kayan gwamanti kayanmu ne, kuma kaso na kudin kasa, wanda  ina da kaso  a ciki, don haka ba zan kona ba, ba zan bari a kona ba.

Dole matashi ya san  mulki  canjawa yake, amma kayan gwamnati suna nan. Idan mai mulki ya tafi dole ya bar aikin da ya yi. Ya yi kadan ya kai gidansu ko dakinsa. Don haka amfaninsa yana ga wadanda aka yi mawa.

Tunda kayan gwamnati kayanmu ne na me zan taba su ko in bari a taba su? Matashi  ya sani idan aka yi rikici, shi mai mulki ya saci kudinmu. Zai ta da hannunsa ne, ya kara gaba. Mu zai bari wadanda aka yi wa satar. Sai  kuma abin daAllah  Ya  kwatar mana daga  aikin da aka yi na kudinmu da aka ba su.

Da ina cikin matasa ba zan kai wa   wadanda ba addininmu daya ko wadanda  muke da bambancin kabila farmaki ba. Wai ma saboda me? Saboda  siyasa? Ai  wani rai  ba ya daukar laifin wani ra!’ Kuma idan na kai hari ga wadansu aka kai wa ’yan uwana  a wani wuri; me aka yi ke nan? Idan da ni matashi ne, duk wanda ya yi safarar kwaya in sha, in yi bangar siyasa, don hankalina ya fita  in aikata abin da yake nema, ba zan sha ba. Amma kuma zan yi  kamar na sha in koya masa hankali, in ce ai ina cikin maye ne.

Da ina daga cikin matasa zan yi amfani da hankalina ga duk abin da  zan yi, zan tsara  nuna fushina a tsanake, yadda zai yi tasiri,  kuma ya yi amfani,  ba tare  da cewa na  gwada  ni ba ni da wayewa ba.

Wannan ’yar shawarar na yi ta ga ’yan  kannenmu na Katsina, amma in matashin wata shiyya ya karanta ya ga abin amfani masha Allah, kowa na iya amfani da ita.  Gaskiyar magana wannan shawara tawa mai tsada ce, don har na so in ce ban da Bagobiri da Banufe da Bahadeje. Duk da cewa wadannnan bayinmu ne, na amince matasansu su yi amfani da ita.

Danjuma Katsina, dan jarida  ne, marubuci  da ke  zaune a Katsina.

08035904408

email:[email protected]