Matashi ya yi wa matar wansa fyade ya kashe ta a Binuwe

An tsinci gawarta a gona da alamar an yi mata fyade kuma an sassare ta da adda a hancinta da kanta.

Jama’ar gari sun kona wani matashi da ransa kan yi wa matar dan uwansa fyade sannan ya kashe ta a kauyen Achoho da ke Karamar Hukumar Gwer ta Gabas a Jihar Binuwe.

Ranar Litinin jama’a suka cafke matashin mai shekaru 22 suka banka masa wuta ya mutu, saboda ya kashe matar dan uwan nasa bayan ya yi mata fyade a gona.

Shaidu sun ce ranar Juma’a matashin suka je gona tare da matar dan uwan nasa, amma dukkansu ba su dawo ba, sai daga baya aka tsinci gawarta a gonar da alamar an yi mata fyade kuma an sassare ta da adda a hancinta da kanta.

Daga bisani shi kuma aka samu labarin yana garin Tse-Agberagba, hedikwatar Karamar Hukumar Konshisha LGA, inda mahaifiyarsa take aure, amma da aka je can ba a same shi ba.

• Daliba ta ‘kashe kanta’ a dakin otel
• Hanyoyin Da ‘Yan Arewa Za Su Ci Moriyar Soshiyal Midiya

A hanyar dawowa daga inda mahaifiyarsa take ne masu neman sa suka yi kicibus da shi a kauyen Agidi, suka far masa da duka.

A cewarsu, matashin ya amsa cewa ya yi wa matar dan uwan nasa fyade sannan ya kashe ta, kafin su cinna masa wuta su kona shi.